5 dekabr tarixində Qardabanidə fəaliyyət göstərən “BEEZ” Uşaq
Teatrında gürcü ədəbiyyatının vacib simalarından biri olan tanınmış
gürcü şairi və yazıçısı Vaja Pşavelanın uşaqlar üçün yazdığı “Meşə
komediyası” pyesi kitabının təqdimatı keçirilib.
Təqdimat mərasimində ziyalılar, müəllimlər, QHT nümayəndələri və
Qardabani sakinləri iştirak ediblər.
Kitabın təqdimatından sonra “BEEZ” Uşaq Teatrının “Meşə komediyası”
pyesi əsasında hazırlanmış tamaşa nümayiş etdirilib.
Sonda tamaşada iştirak edən balaca aktyorlar “BEEZ” Uşaq Teatrı
tərəfindən diplom və maarifləndirici hədiyyələrlə təltif olunublar.
Həmçinin ictimai fəal Samirə Bayramova da teatrın aktyorlarını
özünəməxsus hədiyyələrlə sevindirib.
Pyesi gürcü dilindən Azərbaycan dilinə Aynurə Əliyeva tərcümə edib.
Kitabın redaktoru və nəşrə hazırlayanı Azər Musaoğlu, dizayneri isə
Elsevər Əhmədovdur.
Qeyd edək ki, kitab Gürcüstanın Mədəniyyət, İdman və Gənclər
Nazirliyinin 2021-ci ildə elan etdiyi “Uşaqlar və yeniyetmələrin
özəl yaradıcılıq studiyalarına dəstək” müsabiqəsində “BEEZ” Uşaq
Teatrının qalib gəldiyi “Səhnədən inteqrasiya” layihəsi əsasında
çap olunub.
Layihəyə əsasən, Vaja Pşavelanın “Meşə komediyası” pyesi Azərbaycan
dilinə tərcümə olunaraq kitab şəklində nəşr olunub və
bələdiyyələrin kitabxanalarına, məktəblərə, icma mərkəzlərinə
paylanılıb, həmçinin pyes “BEEZ” Uşaq Teatrı tərəfindən
səhnələşdirilərək Qardabani, Rustavi, Marneuli və Bolnisi
bələdiyyələrində nümayiş etdirilib.