30 oktyabr tarixində Tbilisidə “Savate” üzrə beynəlxalq turnir keçirilib. Tbilisi meriyasının təşkil etdiyi turnirdə Marneulili idmançılar da iştirak ediblər. “Sayokan” federasiyasının prezidenti Faiq Məmmədovun sözlərinə görə, onun rəhbərlik etdiyi “Qızıl canavar” karate idman klubundan beş idmançı yarışda iştirak edib.

“Tbilisidə keçirilən yarışa 5 idmançı ilə qatılmışdıq. Onlardan ikisi peşəkar yarışda, üçü isə həvəskar yarışda iştirak edirdi. Peşəkar yarışda idmançılar 4 kəmər uğrunda mübarizə aparırdı. Həmin kəmərlərdən birini mənim idmançım qazandı. 55 kq çəki dərəcəsində Altun Əsgərov kəmər sahib olaraq, birinci yerə çıxdı. 70 kq çəki dərəcəsində peşəkar yarışda mübarizə aparan Məhəmməd Əhmədov isə finalda uduzaraq ikinci yeri qazandı. Həvəskar yarışda iştirak edən idmançılarım Nicat Əlizadə birinci yerə çıxaraq, kubok və medalı götürdü. Amil Pirverdiyev və Kənan Musayev isə ikinci yeri qazandılar”, – Faiq Məmmədov dedi.


Turnirdə Marneuli ilə yanaşı Qardabani, Bolnisi, Saqareco, Tbilisi və Gürcüstanın digər bölgələrindən də idmançılar iştirak edirdilər. Qardabanidə fəaliyyət göstərən “Qaracalar” idman klubunun idmançısı peşəkar yarışda uğurla çıxış edərək, kəmərə sahib olub. Klubun məşqçisi İsfahan Əliyevin dediyinə görə, onun idmançıları həmin yarışa çox yaxşı hazırlaşıblar.

“Mənim idman klubumdan yarışda 4 idmançı iştirak edirdi. Peşəkar yarışda iştirak edən, 60 kq çəki dərəcəsində döyüşən Eltun Məmmədov kəmərə sahib oldu və birinci yerə çıxdı. Həvəskar yarışa qatılan üç idmançım – Fətullah Xəlilov, Aftandil Mehdiyev və Paşa Bayramov isə birinci yerə çıxaraq, medal və kubok qazandılar”, – İsfahan Əliyev dedi.


Peşəkar yarışda birinci yerə çıxan idmançılara 200 lari, ikinci yeri qazanan idmançılara isə 100 lari pul mükafatı verilib. Həmin yarışda Bolnisi rayonunun Aşağı Qoşakilsə kəndində fəaliyyət göstərən “İnam kikboks klubu”nun idmançıları da iştirak ediblər. Həmin idman klubun idmançıları həvəskar yarışda döyüşüblər.

“Biz bu yarışa iki idmançı ilə qatılmışdıq. İdmançılarım həvəskar yarışda iştirak edirdilər. Onlardan 25 kq çəki dərəcəsində Nihat Babayev birinci yerə çıxdı. 53 kq çəki dərəcəsində döyüşən Rüfət Məmmədov isə finalda məğlub olaraq ikinci yeri qazandı”, – Klubun məşqçisi Şahin Bəxtiyarov dedi.


4 kəmər uğurunda keçirilən peşəkar yarışda 4 kəmərdən birini Tbilisi, digər birini isə Ermənistan idmançısı qazanıb.

Tbilisidə keçirilən beynəlxalq turnirdə Gürcüstanla yanaşı Ermənistan idmançıları da iştirak ediblər.