2 noyabr tarixində USAİD-in Avropa və Avrasiya ölkələrində administrator müavini Erin Makii Marneuli bələdiyyəsində qonaq olub. Görüş Marneulinin “Geo Hospitals”-ın Doğum Evi və Ambulatoriyada keçirilib. Görüş zamanı tibb bacılarının hazırlanması ilə əlaqədar qarşlıqlı əməkdaşlıq memorandumu imzalanıb. USAİD-in maliyyə dəstəyi ilə bələdiyyədə tədris mərkəzləri açılacaq. Burada tibb bacılarına kvalifikasiyalarını yüksəltmək şəraiti yaradılacaq. Erin Makiinin “Marneuli” radiosu ilə söhbət zamanı bildirdiyinə görə, bu yeni iş yerlərinin yaranması və yaxşılaşdırılmış səhiyyə üçün imkan olacaq.

“USAİD bu gün Gürcüstanın təhlükəsizliyinə dəstəyi daha da genişləndirir və dəstək olur. Gürcüstanın daha da uğurlu olmasına dəstək olur. Bu Gürcüstanı Avropa İttifaqı və oraya inteqrasiyaya daha da yaxınlaşdıracaq. Bu tərəfdaşlıq yeni hazırlıq proqramları yaradacaq və Gürcüstanın Avropa İttifaqı ilə Assosiyasiya sazişi baxımından tələb olunan peşə standartlarını qane edəcək.
Avropa İttifaqına namizəd statusu və üzvlüyün özü Gürcüstan üçün uğurlu, güclü ölkə olmağa ən yaxşı zəmanətdir. Bu tərəfdaşlıq əvvəl Geo Hospitalsda yeni iş yerləri yaradacaq, səhiyyə sisteminin əlçatanlığını yaxşılaşdıracaq. Həmçinin, etnik azlıqlar üçün Marneulidə və Gürcüstanın digər regionlarında bu şəraiti yaradacaq”.

“Geo Hospitalsın” Baş direktoru Zurab Kitoşvilinin sözlərinə görə, tədris mərkəzləri onların tibb müəssisəsində işləyən tibb bacılarına, eləcə də başqa klinikalarda işləyən tibbi heyətə xidmət göstərəcək. İxtisasın artırılması ilə yanaşı layihə tibb bacılarının maaşının artırılması imkanı da yaradır.

“Memorandum imzalandır. Gürcüstanın müxtəlif məkanlarından tədris mərkəzləri açılacaq və tibb bacıları hazırlanacaq. Layihə çərçivəsində beynəlxalq standartlar bölüşüləcək, keyfiyyət daha da artırılacaq. Bu sektorda maaşın artması, yeni işlə təmin olunma imkanlarının yaradılmasına şərait yaradır. USAİD-lə tərəfdaşlıq qismində bu yeni çağırış və yeni imkandır”.

“Geo Hospitalsın” tibb bacılarının sözlərinə görə, qeyd olunan proqram onların işinin keyfiyyətinə mühüm dərəcədə təsir göstərəcək.

“Peşə inkişafının böyük əhəmiyyəti var. Çünki regionda tibbi heyətin fəaliyyəti, kvalifikasiyası böyük rol daşıyır. Hələ ki, kovid vəziyyət fonunda tibb bacısı vəzifəsinin böyük rolu var və USAİD-in kursları kvalifikasiyanı yüksəltməkdə bizə çox kömək edəcək”, – Tibb Bacısı Xidmətinin rəhbəri Nino Dokvadze bildirdi.

Bugünkü görüşdə USAİD-in nümayəndəliyi, tibb sahəsi nümayəndələri və yerli özünüidarə iştirak edirdi.