“Azərbaycan Prezidenti İlham Əliyevlə keçirilən bu
müzakirələrə, onu dinləməyə və Prezidentin bizim suallarımızı
cavablandırmasına şad olduq”.
Bu barədə noyabrın 25-də Bakıda, ADA Universitetində “Orta Dəhliz
boyunca: geopolitika, təhlükəsizlik və iqtisadiyyat” mövzusunda
keçirilən beynəlxalq konfransın iştirakçısı, Gürcüstanın Strateji
və Beynəlxalq Araşdırmalar Fondunun Prezidenti Ekaterina Metreveli
jurnalistlərə açıqlamasında deyib.
Ekspert Azərbaycan Prezidentinin regional vəziyyət, və bölgədə
nəqliyyat və kommunikasiya şəbəkələrinin açılması ilə bağlı suala
cavab verdiyini bildirib:
“Gürcüstan perspektivindən
yanaşdıqda, mənim burda olmağım çox vacib idi, mən nəqliyyat, karqo
və enerji sahəsində əməkdaşlıq imkanları və bu sahələrdə regional
əməkdaşlığın güclənməsi istiqamətində Azərbaycan tərəfinin planları
ilə tanış oldum. Gürcüstan və Azərbaycan arasında əməkdaşlıq,
regional vəziyyətlə bağlı məsələlərdən əlavə, Mərkəzi Asiya ilə
əməkdaşlıq, Orta Dəhlizin potensialı və s. barədə kifayət qədər
məhsuldar müzakirələrimiz oldu”.
Ekaterina Metreveli Azərbaycanın “yaşıl enerji”yə əsaslanan
elektrik istehsalı istiqamətində görülən işlər barədə də kifayət
qədər məlumat aldığını qeyd edib.
O, Azərbaycanla Ermənistan arasında sülh sazişinin imzalanacağına
ümidini ifadə edib:
“Regionda sülhün və stabilliyin
əldə olunmasına alternativ yoxdur və mən ümid edirəm ki, biz qısa
zamanda buna nail olacağıq. İnanıram ki, Azərbaycan və Ermənistan
üçün məqbul sülh sazişi əldə olunacaq. Bunun üçün başqa yol yoxdur,
sülh və sabitlik əməkdaşlıq üçün əsas şərtdir”.