Marneuli yerli özünüidarəsi Bələdiyyə Məclisi üçün yeni binanın
tikilməsini planlaşdırır.
Marneuli meriyası yeni binanın tikintisi ilə bağlı smeta
sənədlərinin olunması üçün 22 mart tarixində tender elan edib.
Marneuli Bələdiyyə Məclisinin sədri Amiran Qiorqadze “Marneuli”
radiosu ilə söhbəti zamanı bildirdi ki, Bələdiyyə Məclisi üçün yeni
binanın tikintisinə bələdiyyənin qanunvericilik orqanı işçilərinin
sayının çox olması səbəb olub.
“Tenderi ona görə elan etdik ki, otaqlara yerləşmirik.
Özünüz də görürsünüz, kabinetlərdə bir nəfər əvəzinə beş-altı nəfər
oturur, yer yoxdur. Həm də binada yerləşən MMC-lər də yeni binaya
keçəcək, bütün MMC və qeyri-kommersiya təşkilatları oraya keçəcək.
İndi olduqları bina qəzalıdır. O, sökülməlidir və qərar verdik ki,
onun yerində Bələdiyyə Məclisi binası tikilsin. Bu yəqin bir ildən
sonra olacaq”, – Amiran Qiorqadze bildirdi.
Marneuli Bələdiyyə Məclisi sədrinin sözlərinə görə, Bələdiyyə
Məclisi Aparatında 40 nəfər işçi var, buraya Bələdiyyə Məclisinin
üzvləri, komissiya sədrləri və müavinləri də əlavə olunur. O,
bildirir ki, məhz buna görə Bələdiyyə Məclisi üçün yeni binanın
tikilməsinə ehtiyac yaranıb. Qiorqadzenin sözlərinə görə, meriya
indiki mərhələdə yalnız Bələdiyyə Məclisi binasının smeta
sənədlərinin tərtib edilməsini planlaşdırır. Tikinti işləri üçün
isə vəsait 2024-cü ilin büdcəsindən ayrılacaq.
Marneuli yerli özünüidarəsi Bələdiyyə Məclisi binasının smeta
sənədlərinin tərtib edilməsi xidməti üçün 42 000 lari xərcləməyi
planlaşdırır.
Bələdiyyə Məclisinin yeni binası Marneuli İctimai Kitabxanasının
ərazisində tikiləcək.