Marneuli bələdiyyəsinin Saimerlo kəndində yeni su şəbəkəsinin sınaqları zamanı nasazlıqlar aşkarlanıb. Yeni salınmış yolun bəzi hissələrinə su sızıb. Kənd 24 saatlıq fasiləsiz su təchizatına keçməli idi, lakin hazırda əhaliyə su fasilələrlə verilir. İçməli su bəzi günlərdə ya bir neçə saatlıq kəsilir, ya da aşağı təzyiqlə təmin olunur.

Gürcüstanın Birləşmiş Su Təchizatı Şirkətinin Kvemo Kartli regional bölməsinin rəhbəri Kaxaber Çoqoladzenin “Marneuli” radiosuna verdiyi məlumata görə, hazırda Saimerlo kəndində yaranan problemlərin aradan qaldırılması istiqamətində işlər görülür. Bəzi ərazilərdə asfalt örtüyünün yenidən salınmasına və su borularının təmirinə ehtiyac var. Şirkət bildirir ki, asfaltın yenidən çəkilməsi təchizatçı şirkət tərəfindən həyata keçiriləcək.

“Saimerlo su şəbəkəsi əvvəlcə “Akelik” adlı şirkət tərəfindən quraşdırılıb. Daha sonra başqa bir şirkət tərəfindən sınaq işləri aparılıb və bu zaman su təchizatında qüsurlar aşkarlanıb. Kənddə asfalt örtüyü çəkilib, lakin yeni şəbəkədə asfaltın altından su sızır. Bu nasazlıqlar asfalt işləri ilə əlaqəli ola bilər, çünki şəbəkə olmadan sızma mümkün deyildi. Problemin əsas səbəbi isə su təzyiqinin artması ola bilər. Hazırda bu nasazlıqlar aradan qaldırılır. Bəzi yerlərdə asfalt örtüyünün sökülməsi, zədələnmiş hissələrin bərpası və yenidən asfalt salınması nəzərdə tutulur. Bizim əməkdaşlıq etdiyimiz tikinti şirkəti bu işi müqaviləyə əsasən həyata keçirir. Əhali tez-tez baş verən su fasilələrindən narazıdır. Bu hallar bəzi bölgələrdə müşahidə olunur, lakin bütün kəndi əhatə etmir. Asfalt örtüyünün söküldüyü və tikinti işlərinin aparıldığı ərazilərdə bəzən suyun verilməsi müvəqqəti dayandırılır. Bu proses zaman tələb edir və sakinlərin narazılığına səbəb olur, lakin bu hallar şirkətimizdən asılı olmayan səbəblərlə bağlıdır,” – deyə Kaxaber Çoqoladze bildirib.

Onun sözlərinə görə, Saimerloda 24 saatlıq su təchizatını təmin etmək üçün aşkarlanmış nasazlıqların bir ay ərzində aradan qaldırılması planlaşdırılır.

Marneuli və onun kəndlərində su təchizatı və kanalizasiya layihəsinə 2019-cu ildə start verilib. Layihə çərçivəsində yollar qazılıb, infrastruktur zədələnib, ictimai nəqliyyata və şəxsi avtomobillərə ziyan dəyib. Əvvəlcə Türkiyənin “Akelik Group” şirkəti layihəni 2021-ci ilin mart ayına qədər başa çatdırmalı idi, lakin öhdəliklər yerinə yetirilmədiyindən, dəyəri 55 940 022 dollar olan layihə dayandırılıb.

Daha sonra Su Təchizatı Şirkəti Türkiyə və Çin şirkətləri ilə yeni müqavilə imzalayıb. Hazırda işlər “China Geo-Engineering Corporation” (CGC) və “POLAT Yol Yapı Sanayi və Ticarət Anonim Şirkəti” tərəfindən icra olunur.

Layihə Asiya İnkişaf Bankının dəstəyi ilə həyata keçirilir və ümumi dəyəri 135 milyon laridən çox olacaq. Layihə çərçivəsində yeni su təchizatı şəbəkəsi, nasos stansiyaları, su anbarları, kanalizasiya xətləri və müasir təmizləyici qurğular inşa edilir.

Layihə başa çatdıqdan sonra Marneuli əhalisi 24 saatlıq fasiləsiz su təchizatı və müasir kanalizasiya infrastrukturu ilə təmin olunacaq. Hazırda layihənin iyun ayında tamamlanması müzakirə olunur.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---