Medianın müdafiəsi üzrə Koalisiyanın bəyanatına görə, Bidzina İvanişvili və onun qurduğu “Gürcü Arzusu” partiyası müstəqil mediaya qarşı koordinasiyalı mübarizə aparır. Onlar “Arzunun” hakimiyyətini rejim, onun həyata keçirdiyi siyasəti isə mediaya qarşı sistemli hücum adlandırırlar.

Təxminən 20 müstəqil vətəndaş cəmiyyətini birləşdirən Koalisiya Gürcüstanda müstəqil medianı məhdudlaşdırmaq cəhdlərini aydın şəkildə göstərən əsas aspektləri sadalayır:
• Vicdan məhbusu Mzia Amağlobeli – müstəqil medianın simvollarından biri
“Batumelebi” və “Netgazeti”nin direktoru Mzia Amağlobeli hələ də həbsdədir. Onun işi, digər vicdan məhbuslarının işləri kimi, açıq-aşkar siyasi motivlidir və bu, məhkəmə proseslərində də görünür.

• Medianın əleyhinə fiziki zorakılıq
Avropa yönümlü etiraz aksiyalarının başlanğıcından bəri yüzlərlə müstəqil jurnalistə hücum və ya onların peşə fəaliyyətinə qanunsuz müdaxilə halları qeydə alınıb. Bu insidentlərin heç biri araşdırılmayıb və heç bir təcavüzkar cəzalandırılmayıb ki, bu da cəzasızlıq hissini möhkəmləndirir və zorakı mühitin formalaşmasına şərait yaradır.

• Hüquqi repressiyalar
“Gürcü Arzusu”nun son dövrlərdə təşəbbüs göstərib qəbul etdiyi repressiv qanunvericilik ifadə azadlığını və ictimaiyyətin alternativ fikir və informasiyaya çıxışını məqsədli şəkildə məhdudlaşdırır.

2024-cü il iyunun 2-də məlum olub ki, “Gürcü Arzusu” Komunikasiya Komissiyasına şikayət edib və arzuolunmaz ifadə və terminlərin istifadəsinə görə “TV Pirveli” və “Formula”nın qanun pozucusu kimi tanınıb cəzalandırılmasını tələb edib. Bu işlər Komunikasiya üzrə Milli Komissiya tərəfindən araşdırılır. Onun rəhbəri Kaxa Bekauri Avropa Parlamentinin qətnaməsində adları qeyd olunmuş və zorakı rejimi dəstəklədiyinə görə sanksiya tövsiyə olunan şəxslər siyahısına daxildir.

• İctimai Yayımçı

– “Gürcü Arzusu”nun xidmətində
İctimai Yayımçının hazırkı vəziyyəti onun rəhbərliyinin “Gürcü Arzusu”nun siyasi maraqlarına xidmət etdiyini açıq şəkildə göstərir. Direktor Tinatin Berdzenişvili və Qəyyumlar Şurasının rəhbəri Vasil Mağlaperidze müstəqil və tənqidi jurnalistlərin təqibi və işdən çıxarılmasında iştirak edirlər.
Yayımçı getdikcə cəmiyyətdən uzaqlaşır və öz əsas funksiyasını itirir – bu da redaksiya siyasətindəki qərəzli məzmun və alternativ fikirlərin məqsədli şəkildə nəzərə alınmaması ilə təsdiqlənir.

• Məhkəmə binalarında kameraların qadağan olunması
Açıq ictimai qurumların siyahısına indi məhkəmə sistemi də əlavə olunub. Ötən həftə media nümayəndələrinin məhkəmə binalarına kameralarla daxil olması məhdudlaşdırılıb – bu, bir neçə yüksək ictimai maraq doğuran prosesin eyni vaxtda getdiyi bir dövrdə baş verib. Bu addım şəffaflıq prinsipini pozur və cəmiyyətin məhkəmə proseslərini izləməsinə mane olur.

• Jurnalistlərin cərimələnməsi
Mediada çalışan jurnalistlərə qarşı sistemli təzyiqlər davam edir – xüsusilə də fasiləsiz etiraz aksiyalarını işıqlandırmağa çalışdıqları zamanlarda onlar gündəlik şəkildə cərimələnirlər. Bu praktika azad medianın təqibinin bariz nümunəsidir.
• İqtisadi təzyiq

Müstəqil mediaya təzyiq maliyyə vasitələri ilə də həyata keçirilir. Xaricdən alınan maliyyələşmənin qadağanı ilə yanaşı, biznes şirkətlərinə müstəqil mediayla müqavilələri dayandırmaları üçün təzyiq göstərilir. Şirkətlər yüksək reytinqli kanallarla əməkdaşlıqdan imtina etməyə məcbur edilirlər.

• Qəsdən dezinformasiya
Müstəqil media və jurnalistlərə qarşı davamlı şəkildə dezinformasiya kampaniyaları aparılır. Bu yolla “Gürcü Arzusu” ictimaiyyətdə mediaya olan etimadı sarsıtmağa və obyektiv informasiya mənbələrini nüfuzdan salmağa çalışır.
Media Hüquqlarının Müdafiə Koalisiyası bütün müstəqil media qurumlarına həmrəylik ifadə edir və onları demokratik dəyərlərin müdafiəsi və daha yaxşı Avropa gələcəyinin təmin olunması istiqamətində dəstəkləməyə davam edir.

“Gürcü cəmiyyəti, etibarlı informasiyanın əlçatanlığını və vətəndaşların ölkənin siyasi və sosial həyatında tam iştirakını təmin edən azad və müstəqil mediaya layiqdir. Medianın azadlığı Gürcüstanın demokratik inkişafı və Avropaya inteqrasiyası üçün fundamental bir dəyərdir”, - deyə Koalisiya bildirib.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---