10 iyul tarixindən etibarən Tamar Taliaşvili Gürcüstanın ABŞ-dakı səfiri təyin olunur. Onun bu vəzifəyə rəsmi olaraq başlaması üçün “Gürcü Arzusu” hökumətinin seçdiyi altıncı prezident Mixeil Kavelaşvilinin razılığı tələb olunur.

Taliaşvili bu vəzifəyə Gürcüstan hökuməti tərəfindən seçilib. Müvafiq sərəncam 9 iyun tarixində “Gürcü Arzusu”nun baş naziri İrakli Kobaxidze tərəfindən imzalanıb.
Azadlıq radiosu artıq 25 aprel tarixində məlumatlı mənbəyə əsaslanaraq yazırdı ki, bu vəzifəyə məhz Tamar Taliaşvili təyin olunacaq. O zaman redaksiya Taliaşvili ilə telefon zəngi və SMS vasitəsilə əlaqə saxlamağa çalışmışdı, lakin o, cavab vermək istəməmişdi.

Tamar Taliaşvili kimdir?
Taliaşvili 2022-ci ilin oktyabrından 2025-ci il 9 iyunadək Gürcüstanın Avropa Şurası yanındakı daimi nümayəndəsi olub. Bu vəzifəyə təyin olunması üçün ona deputat mandatından imtina etmək lazım gəlib. O, 2020-ci ilin oktyabrında “Gürcü Arzusu”nun seçki siyahısı ilə Parlamentə daxil olmuşdu.

Tamar Taliaşvili 2014-2020-ci illərdə Tbilisi Bələdiyyə Məclisinin (sakrebulo) üzvü olub və bu müddət ərzində Təhsil və Mədəniyyət Komissiyasına sədrlik edib.

Xarici İşlər Nazirliyinin saytında yerləşdirilən rəsmi bioqrafiyaya görə, o, 2011-ci ildə ABŞ Dövlət Departamentinin “Dövlət xidmətində qadınlar” proqramı üzrə namizəd kimi təqdim olunub. Siyasətə gəlməzdən əvvəl müxtəlif dövrlərdə ABŞ-ın USAID fiskal islahatlar layihəsində hüquqi təminat proqramının meneceri, Almaniyanın GIZ təşkilatında hüquqi məsələlər üzrə müşavir vəzifələrində çalışıb.

Altı ay səfirsiz
Gürcüstanın ABŞ-dakı sonuncu fövqəladə və səlahiyyətli səfiri, sabiq xarici işlər naziri David Zalkaliani 2024-cü il 30 noyabr tarixində istefa verib. Bu qərar Vaşinqtonun Gürcüstanla strateji tərəfdaşlığı dayandırmasından sonra verilib. ABŞ bu addımı insan haqları təşkilatlarının qiymətləndirməsinə əsasən Tbilisidə keçirilən avropayönlü etiraz aksiyalarında iştirakçılara və jurnalistlərə qarşı polisin həddindən artıq güc tətbiq etməsi fonunda atıb.

İrakli Kobaxidze o zaman Zalkalianinin istefasına belə münasibət bildirmişdi:

“Çox ciddi təzyiqlər vardı, burada yalnız müxalifət nəzərdə tutulmur. Ona yalnız həmrəylik bildirmək olar. Təəssüf ki, vəzifəsindən getdi – bu, onun seçimi idi və biz bu qərara hörmətlə yanaşırıq.”

Gürcüstanın ABŞ-dakı səfiri necə təyin olunur?
Konstitusiyaya əsasən, Gürcüstanın ABŞ-dakı səfiri hökumətin təqdimatı ilə eyni hökumət tərəfindən seçilmiş prezident – hazırda Mixeil Kavelaşvili – tərəfindən təyin olunur:

“[Prezident] hökumətin təqdimatı ilə Gürcüstanın səfirlərini və diplomatik nümayəndəlik rəhbərlərini təyin edir və vəzifədən azad edir” , – Gürcüstan Konstitusiyasında deyilir.

Bundan əvvəl isə səfirliyə namizədə “ev sahibi ölkə” – bu halda ABŞ – razılıq verməlidir. Yalnız bu razılıqdan sonra prezident müvafiq sərəncamı imzalayır.

Səfir təyinat aldıqdan sonra Gürcüstandan ABŞ-a etimad məktubunu aparır və yalnız bundan sonra diplomatik fəaliyyətə başlayır.

ABŞ ilə münasibətlər
2024-cü il 30 noyabr tarixində ABŞ Gürcüstanla strateji tərəfdaşlığı rəsmi olaraq dayandırdı. Münasibətlər o vaxt gərginləşdi ki, “Gürcü Arzusu” beynəlxalq çağırışlara baxmayaraq, “xarici agentlər haqqında” qanunu qəbul etdi və küçələrdə keçirilən etirazları güc tətbiq etməklə dağıtdı.

ABŞ buna cavab olaraq hakim partiyanın – “Gürcü Arzusu”nun üzvlərinə, deputatlara, hüquq-mühafizə orqanlarının əməkdaşlarına və bəzi fiziki şəxslərə qarşı sanksiyalar tətbiq etdi. Bu proses 2024-cü ilin iyununda başladı və sonrakı aylarda da davam etdi. Ümumilikdə 100-dən artıq şəxsin adı sanksiya siyahısına düşüb.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---