Rusiyanın TASS agentliyinin məlumatına görə, Rusiya Federal Təhlükəsizlik Xidmətinin (FSB) və Abxaziyanın de-fakto Dövlət Təhlükəsizlik Xidmətinin əməkdaşları Suxumi Beynəlxalq Hava Limanının mühəndis xidməti üzrə əməkdaşını saxlayıblar. Bildirilir ki, o, Ukraynanın hərbi kəşfiyyatı ilə əməkdaşlıq edirmiş.

FSB-nin açıqlamasına əsasən, Ukraynanın xüsusi xidmət orqanlarının tapşırığı ilə həmin şəxs hava limanının və onun yaxınlığında yerləşən, rəsmi beynəlxalq nümayəndə heyətlərinin qəbulunda istifadə olunan qapalı dayanacaq sahəsinin sxemlərini düşmən tərəfə ötürmək istəyib. Qeyd olunur ki, bu sxemlər partlayıcı qurğu yerləşdirilməklə mümkün terror aktı üçün istifadə oluna bilərdi.

Məlumata görə, Abxaziyanın de-fakto Dövlət Təhlükəsizlik Xidmətinin İstintaq İdarəsi onun barəsində “Abxaziya Respublikasının Cinayət Məcəlləsinin 274-cü maddəsi (casusluq)” ilə cinayət işi açıb.

"Bəlli olub ki, o, gizli şəkildə Ukrayna Müdafiə Nazirliyinin Baş Kəşfiyyat İdarəsinin nümayəndəsi ilə əməkdaşlıq edib və onun göstərişi ilə Suxumi Beynəlxalq Hava Limanında görülən işlərlə bağlı məlumatlar ötürüb. Həmin şəxs mühəndis-texniki xidmət üzrə mütəxəssis kimi çalışırmış."

Bundan əlavə, Rusiya agentliyi qeyd edir ki, “sorğu-sual zamanı o, Ukraynanın Baş Kəşfiyyat İdarəsi ilə əməkdaşlığını etiraf edib, yerinə yetirdiyi tapşırıqlar və qarşıya qoyulan məqsədlər, o cümlədən Rusiya Federasiyası rəsmilərinin Abxaziyaya səfərlərinə dair məlumat topladığını təsdiqləyib.”

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---