ABŞ prezidenti Donald Tramp İsrail və İran arasında atəşkəsin qüvvəyə mindiyini bildirib.

"Atəşkəs qüvvəyə mindi. Xahiş edirəm onu pozmayın!", - o, sosial şəbəkədə yazıb.


Bu gün səhər İran dövlət televiziyası İsraillə hərbi münaqişədə atəşkəsin başlandığını elan edib.

Bundan bir neçə saat əvvəl ABŞ prezidenti D.Tramp İsrail və İran arasında "tam atəşkəs" haqqında razılığın əldə olunduğunu açıqlamışdı.

"The New York Times"in yazdığına görə, atəşkəs razılaşması Amerikanın təklifini İrana çatdıran Qətərin vasitəçiliyi ilə əldə olunub.

İsrail rəsmən İranla atəşkəs elan edib.

Netanyahunun ofisindən bildirilib ki, İsrail nüvə və raket sahəsində təhlükələri aradan qaldırmaqla İrana qarşı hərbi əməliyyatın bütün məqsədlərinə nail olub.

Vurğulanıb ki, Tehran tərəfindən atəşkəs şərtlərinin pozulmasına İsrail qətiyyətlə cavab verəcək.

23 iyun
Tramp İrana təşəkkür etdi
İran Qətərdəki ABŞ bazasına hücum niyyəti barədə əvvəlcədən xəbərdarlıq edib, bunun sayəsində ölən və ya xəsarət alan olmayıb. Bunu ABŞ prezidenti Donald Tramp "Truth Social" platformasında yazıb.

"...erkən xəbərdarlığa görə İrana təşəkkür etmək istəyirəm. Ola bilsin, İran indi regionda sülh və harmoniya yolunu tutacaq, İsraili də buna təşviq etmək həvəsindəyəm", - o vurğulayıb.

Tramp İranın cavabını "çox zəif" adlandırıb. Onun sözlərinə görə, 14 raket atılıb, onlardan 13-ü vurulub, biri isə uçuş istiqaməti təhlükə yaratmadığı üçün "buraxılıb".

ABŞ prezidenti ümidvardır ki, "daha NİFRƏT olmayacaq".


Bazar ertəsi axşam İran Qətərdəki Əl-Udeyd Hərbi Hava Qüvvələri bazasına raket zərbəsi endirib. Burada Amerika, Qətər və Britaniya ordularının bölmələri yerləşir.

Yerli və ABŞ rəsmiləri hücumun dəf edildiyini və itkilərin olmadığını bildiriblər. İran xəbər agentlikləri bazaya altı raketin düşdüyünü iddia edir, lakin bu məlumatın müstəqil təsdiqi yoxdur.

"Axios"un məlumatına görə, bazaya ümumilikdə 10 raket buraxılıb. Bu, İranın İsrailə son zərbələrindən xeyli azdır. "The New York Times" qəzetinin yazdığına görə, İran Qətər hökumətinə zərbə ilə bağlı əvvəlcədən xəbərdarlıq edib. "Axios"un mənbəyi iddia edir ki, Vaşinqton da bundan xəbərdar idi.

Tehranın yaydığı bəyanatda hücumun ABŞ ordusunun İranın nüvə obyektlərinə endirdiyi zərbələrə cavab olaraq həyata keçirildiyi və Qətərə qarşı yönəlmədiyi bildirilir.


Sosial şəbəkələrdə bazanın ərazisində hava hücumundan müdafiə sistemlərinin işinin videosu yayılıb.


Qətər və BƏƏ rəsmiləri hava məkanını bağlayıb. ABŞ-nin Dohadakı səfirliyi vətəndaşlara növbəti xəbərdarlığa qədər ehtiyat tədbiri olaraq sığınacaqlara enməyi tövsiyə edib.

CNN xəbər verir ki, Bəhreyndəki ABŞ səfirliyinin əməkdaşları sığınacaqlara göndərilib.

İraqdakı Amerika bazasına da zərbə endirilməsi ilə bağlı xəbərlər var, lakin bu mümkün hücumla bağlı, hələlik, təfərrüatlar yoxdur.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---