“Gürcü Arzusu”nun təşəbbüsü ilə hazırlanmış qanunvericilik dəyişikliyi paketinə əsasən, hakimlərin maaş sistemi dəyişir. Yeni qaydaya görə, şəhər, rayon, apellyasiya və Ali Məhkəmələrin hakimlərinin aylıq maaşı iki və daha çox artırılır.

Maaş artımı, o cümlədən ABŞ, Böyük Britaniya, Litva və Estoniya tərəfindən müxtəlif vaxtlarda sanksiyaya məruz qalmış hakimlərə – Levan Murusidze, Mixeil Çinçaladze və İrakli Şengeliyaya da şamil olunur.

Dəyişikliklər nəticəsində, hər bir hakimin aylıq maaşı 10 000 laridən çox olacaq.

Qanun layihəsinin yayımlandığı gün, Avropa İttifaqının xarici siyasət və təhlükəsizlik məsələləri üzrə ali nümayəndəsi Kaja Kallas bəyan etdi:

“Gürcüstanın məhkəmə sistemi repressiv maşının bir hissəsinə çevrilmiş kimi görünür. Buna görə də biz hakimlərə qarşı sanksiyaların tətbiqini müzakirə etdik”.

Kimə nə qədər maaş veriləcək?
Hazırda Ali Məhkəmənin sədrinin maaşı 7 000 lari təşkil edirsə, dəyişikliklə bu məbləğ 14 600 laridək artırılır. Bu vəzifəni hazırda Nino Kadagidze tutur.

Kadagidze 4 aprel tarixində, Avropa sanksiyalarının fonunda Ali Məhkəmədə hökumət başçısı İrakli Kobaxidzeni qəbul edərkən belə deyib:

“Bizim sistemin dayanıqlığına və hər bir həmkarımın möhkəmliyinə şübhəmiz yoxdur”.

Digər vəzifələr üzrə maaşlar aşağıdakı kimi dəyişir:

• Ali Məhkəmə sədrinin birinci müavini (Qiorqi Mikautadze) - 6 500 lari əvəzinə 13 432 lari;
• Ali Məhkəmənin sədr müavini (Levan Tevzadze) - 6 300 lari əvəzinə 13 140 lari;
• Ali Məhkəmənin hakimləri (yuxarıda qeyd olunan inzibati vəzifələri tutmayan bütün hakimlər) – 6 000 lari əvəzinə 12 410 lari;
• Apellyasiya Məhkəməsinin sədri (Mixeil Çinçaladze) - 5 800 lari əvəzinə 12 264 lari;
• Apellyasiya Məhkəməsinin sədr müavini (İrakli Şengelia) – 5 600 lari əvəzinə 12 118 lari;
• Apellyasiya Məhkəməsi (Cinayət, Mülki və İnzibati işlər üzrə Kollegiyalar və İstintaq Kollegiyası) Kollegiyasının sədri – 5 300 lari əvəzinə 11 972 lari;
• Apellyasiya Məhkəməsinin bütün digər hakimləri – 5 000 lari əvəzinə 11 826 lari;
• Tbilisi Şəhər Məhkəməsinin sədri (Vasil Mşvenieradze) - 4 600 lari əvəzinə 11 972 lari;
• Digər rayon (şəhər) məhkəmələrinin sədrləri – 4 600 lari əvəzinə 11 388 lari;
• Tbilisi Şəhər Məhkəməsi Kollegiyasının sədrləri - 4 300 lari əvəzinə 11 388 lari;
• Rayon (şəhər) məhkəmə kollegiyasının sədrləri – 4 300 lari əvəzinə 10 950 lari;
• Rayon (şəhər) məhkəməsinin hakimi, magistratura hakimi – 4 000 lari əvəzinə 10 512 lari.

Qanun dəyişikliyinin mahiyyəti nədir?
Mövcud qanunvericiliyə görə, hakimlərin aylıq maaşları konkret rəqəmlərlə göstərilirdi. Yeni dəyişikliklərə əsasən isə bu sistem ləğv olunur – maaşlar bundan sonra “baza vəzifə maaşı”na bağlanacaq.

2025-ci il üçün baza vəzifə maaşı 1 460 lari müəyyən edilib. Hər bir vəzifə üçün ayrıca müəyyən olunmuş əmsal bu rəqəmə vurularaq aylıq maaş hesablanacaq.

Məsələn, Ali Məhkəmə sədrinin əmsalı 10,00-dir. Deməli, onun aylıq maaşı belə hesablanır: 1 460 x 10 = 14 600 lari

Bu sistem gələcəkdə baza maaşı artdıqca, avtomatik olaraq hakimlərin maaşının da artmasını nəzərdə tutur.

Qanun layihəsinin müəllifləri kimlərdir?
Təklif olunan qanun layihəsinin müəllifləri “Gürcü Arzusu” və “Xalqın Gücü” fraksiyalarının deputatlarıdır. Onların arasında Arçil Qorduladze, Tornike Çxeişvili, Rati Yonataşvili, Aluda Quduşauri, Davit Matikaşvili, Tengiz Şarmanashvili, Aleksandre Tabatadze, Quram Maçaraşvili və Akaki Aladaşvili var.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---