1 may tarixindən etibarən Marneuli-Tbilisi (Vağzal meydanı) istiqamətində hərəkət edən mikroavtobuslarda gediş haqqı artırılıb.
Hər gün Marneulidən paytaxta gedən yüzlərlə sərnişinin böyük əksəriyyətini tələbələr təşkil edir. İki şəhər arasındakı məsafənin yaxın olması və Tbilisidə mənzil kirayəsinin baha olması gəncləri gündəlik gedib-gəlməyə məcbur edir.

“Marneuli” radiosu yaranmış vəziyyətlə bağlı tələbələrin fikirlərini öyrəndi. Müsahibə verən gənclər yeni qiymətlərin onlar üçün əlçatan olmadığını və tariflərə yenidən baxılmalı olduğunu bildirdilər.

Algeti kənd sakini, İlia Dövlət Universitetinin hazırlıq kursu tələbəsi Ülvi İsmayılov həftədə iki dəfə Tbilisiyə gedir. O, həm də həftənin beş günü mağazada işləyərək xərclərini qarşılayır.

“Həftədə 5 gün “Ori Nabiji” mağazasında işləyirəm. Qalan 2 gün isə istirahət günüm olduğuna görə Marneuliyə, evimə gəlirəm. Təkcə kənddən Marneuliyə gələndə həftədə 10 lari pul ödəyirəm. Qiymətlər yüksəlmədən əvvəl ayda sadəcə yol üçün təxminən 50 lari xərcim çıxırdı. Əlbəttə ki, yoldan əlavə şəxsi xərclərim də olur. Qiymətlər yüksəldikdən sonra isə düşünürəm ki, mənim yol üçün ayıracağım vəsait daha artıq olmalıdır. Bu isə ayda təxminən 100 lariyə qədər xərcimin artacağını göstərir.

⁠Qiymətlərin bu cür yüksəlməyi necə ki, mənim üçün eləcə də təhsil almaq üçün gedib-gələn bütün tələbələr üçün çətin bir vəziyyətdir. Yeni qiymətlər təkcə tələbələrə deyil, əhali üçün də çətinlik yaradır. Düşünürəm ki, aidiyyəti qurumlar əhalinin və tələbələrin istəklərini və narazılıqlarını nəzərə almalıdır. Qiymətləri yenidən təhlil etməli və yeni, daha əlçatan və uyğun qiymət çıxarmalıdırlar”, - Ülvi dedi.

Adının açıqlanmasını istəməyən digər bir tələbə bizimlə müsahibəsində bildirdi ki, 150 lari yol xərci onun üçün böyük məbləğdir. O, tələbə olduğu üçün işləmədiyini və bütün bu xərcləri qarşılamaqda ailəsindən dəstək aldığını vurğuladı.

“Həftədə 6 gün Tbilisi şəhərinə gedirəm. Kirayə mənzildə qalmaq üçün ev yoldaşı tapa bilmədim deyə gedib-gəlməli oluram. Qiymət qalxmamışdan əvvəl ayda yol üçün 144 lari xərcim çıxırdı. İndi isə 192 lari xərcim olacaq. Tələbələrin çoxu işləmir və xərclərini əsasən ailələrindən aldıqları pulla qarşılayırlar. Bu səbəbdən onların böyük maliyyə imkanları olmur. Tələbə üçün ayda yalnız təxminən 150 lari yol xərci kifayət qədər böyük məbləğ sayılır. Üstəlik, bunun üzərinə əlavə 50 lari də gəldikdə, bu artıq müəyyən dərəcədə maddi çətinlik yaradır”.

Qeyd edək ki, Marneulidən Tbilisiyə iki marşrut xətti fəaliyyət göstərir: Marneuli-Tbilisi (Vağzal meydanı) və Marneuli-Tbilisi (Samqori). Hazırda Marneuli-Vağzal meydanı istiqamətində gediş haqqı 1 lari artaraq 4 lari olub. Marneuli-Samqori xəttində isə qiymət dəyişməyib və 3 lari olaraq qalır.

Xatırladaq ki, gediş haqqının artmasına səbəb yanacağın qiymətinin qalxması olub.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.