Marneuli Bələdiyyə Məclisinin sədr müavini
Mamuka Naveriani İmir kəndindəki 59 saylı məntəqədən protokolu
qaçırması ilə bağlı ittihamları təkzib edir.
“Milli Hərəkat”ın belə ittihamlarını isə yalan
və təxribat adlandırıb.
“Demək istəyirəm ki, bu ağ yalandır. Protokolun bütün
prosedurlara riayət olunaraq doldurulmasını “Milli Hərəkat”ın
üzvünün imzası da təsdiq edir. Əgər yanılmıramsa, adı Raul
Bayramovdur. Onu da deyim ki, mənim protokolu qaçırmamla bağlı
ittihamlar absurddur. Mən protokolu hamı ilə bərabər gözləyirdim.
Protokolu heç cür qaçıra bilməzdim. “Milli Hərəkat”ın özü
tərəfindən aqressiya var idi. Ceyhun Qarayev öz kəndində
uduzduqlarını qəbul edə bilmədi. Zorakılıq var idi və təxribat
törətdi”, - Mamuka Naveriani “Marneuli” radiosu ilə
söhbəti zamanı bildirdi.
Mamuka Naveriani müşahidəçi qismində məntəqədə olub. İmir sakinləri
bu gün etirazlarını bildiriblər və 59 saylı seçki məntəqəsinin
ərazisinə toplaşıblar. Onlar “Mişa” deyə şüarlar səsləndiriblər və
Mamuka Naverianini onların səslərini oğurlamaqda ittiham
ediblər.