“Bu yolun son stansiyası”nın növbəti dayanacağı Bolnisi rayonudur
“Bu
yolun son stansiyası” tamaşasının ssenari müəllifi və quruluşçu
rejissoru Anar Rafiqoğlu Marneuli radiosu ilə söhbəti zamanı
tamaşanın 10 iyun saat 18:00-da Bolnisi mədəniyyət evində baş
tutacağı haqqında məlumat verdi.
Onun sözlərinə görə, tamaşa Bolnisi rayonunda daha əvvəl azərbaycan
dilində səhnələşdirilmişdi. Daha sonra isə Bolnisi majoritar
deputatı Qoqi Meşvelianinin müraciəti əsasında “Bu yolun son
stansiyası” gürcü tamaşaçılarının görüşünə gedəcək. Anar
Rafiqoğlunun sözlərinə görə, tamaşanın Azərbaycan dilində nümayiş
olunduğu rayonlarda tələbat olduğu halda dövlət dilində də
səhnələşdiriləcək. O, onu da qeyd etdi ki, gələcəkdə tamaşanı
Marneuli rayonunda da gürcü dilində nümayiş etdirməyi
planlaşdırır.
“Bu yolun son stansiyası” tamaşası həmçinin Dmanisi rayonunda yaxın
zamanlarda tamaşaçılarını sevindirəcək.
“Dmanisi ucqar rayondur və sakinləri istədikləri zaman paytaxta
gəlib teatrlarda tamaşaları izləyə bilmirlər. Əgər onlar gələ
bilmirsə, o zaman biz gedərik”, – deyə Rafiqoğlu bildirdi.
Qeyd edək ki, Bolnisi rayonunda baş tutacaq tamaşanın maliyyə
dəstəyini Bolnisi bələdiyyəsi həyata keçirir.
Xatırladaq ki, "Bu yolun son stansiyası" tamaşasının əsas mövzusu
insanların zərərli vərdişləri və narkomaniya haqqındadır.
Tamaşa narkotik vasitələrin insanlara olan zərərlərindən və insan
həyatını məhv etməsindən bəhs edir. Tamaşada həmçinin insanların
sosial şəbəkələrdən, texnologiyalardan asılılığı və texnologiyalar
sayəsində həyatın süniləşməsi mövzusuna da toxunulur.
Tamaşada iştirak edirlər: Rabil İsmayılov, Məndər Sərdarov, Səma
Sadiq və Sali Omarova.