Qızlar niyə erkən yaşda evlənməməlidirlər - SORĞU
Erkən evlilik bütün dünyada öz mənfi təsirlərini
göstərməkdədir. Bu problemin səbəb olduğu fəsadlar Gürcüstanda,
xüsusən də etnik azlıqların yığcam yaşadığı Kvemo Kartlidə də
qarşımıza çıxır. Erkən evliliyin yaratdığı əsas problemlərdən biri
gənclərin təhsil həyatından uzaqlaşmalarıdır.
“Marneuli” radiosu Marneulili gənclərin erkən evliliklə bağlı
düşüncələri və erkən evliliyi necə dəyərləndirdikləri ilə
maraqlandı. Müsahibədə əsasən gənc qızlar mövzu ilə bağlı öz
fikirlərini bildirdilər.
Namilənin 20 yaşı var və onun sözlərinə görə, qız və ya oğlan fərqi
yoxdur, ilk olaraq ictimai məktəbi bitirib ali təhsil almalı, daha
sonra isə öz işlərini qurmalıdırlar. Namilə deyir ki, həyatı dərk
etməyən, öz karyerasını qurmayan biri evlilik həyatında da uğurlu
ola bilməz. O, bildirdi ki, erkən evliliyi mənfi qarşılayır və onun
fikrinə görə, kişilərdən daha çox qadınlar təhsil almalıdırlar.
Çünki, kişilər istədikləri müəssisədə çalışa bilərlər, qadınlar isə
yox.
22 yaşlı Ellada boşanmaların əsas səbəbi olaraq erkən evliliyi
misal göstərdi. Onun sözlərinə görə, səhv seçim edilməsi
nəticəsində boşanmalar baş verir, nəticədə isə uşaqlar öz
həyatlarına ayrılmış valideyinlərlə davam etməli olurlar. Namilə
kimi Ellada da düşünür ki, qadınlar mütləq təhsil almalıdırlar.
Belə olduğu halda onlar evlilik həyatında daha doğru qərarlar almış
olacaqlar.
Namilə və Ellada kimi Çiçək də erkən evlilik mövzusunu mənfi
dəyərləndirir. Onun 23 yaşı var və düşünür ki, qadın öz hüquqlarını
bilmirsə, istər fizioloji, istərsə də psixoloji baxımdan zorakılığa
məcbur qalır. O, deyir ki, 16 yaşında bir qız evlənir və evdə hər
hansı bir iş görməyi bacarmırsa, ona bu ifadələri ünvanlayırlar:
"Evlənməyi bilirsən, iş görməyi yox?" belə olduğu
halda isə ona psixoloji zorakılıq tətbiq olunur. Çiçəyin sözlərinə
görə, bəzən yaş artdıqca insanın düşüncələri də dəyişir, seçim
etdiyi həyat yoldaşına qarşı fikirləri dəyişir və başa düşür ki, o,
öz seçimində yanılıb. Beləliklə həmin qadın uşaq yaşında etdiyi
seçiminə baxıb həyatı boyunca peşmançılıq hissi yaşayır. Bunu isə
heç bir qadın arzu etməz.
Xatırladaq ki, Laqodexidə baş verən hadisə zamanı
16 yaşlı qıza qarşı 40 yaşlı İ.B. tərəfindən zorakılıq tətbiq
olunmuş və məktəbli özü də bilmədən uşaq dünyaya gətirmişdi. Daha
bir zorlama hadisəsi isə Saqarecoda 24 yaşlı kişi tərəfindən 14
yaşlı qıza qarşı törədilmişdi.