Marneulidə koronavirusa yoluxmuş şəxsin təmasda olduğu 86 nəfər
müəyyən olunub. Bu barədə Xəstəliklərə Nəzarət Milli Mərkəzinin
direktoru Amiran Qamkrelidze “Pirveli” kanalı ilə söhbəti zamanı
deyib.
Marneulidə koronavirusa yoluxma halı bu gün, 22 mart tarixində
qeydə alındı. Həmin şəxs “Geo Hospitals” klinikasında müalicə
olunurdu.
“Bizim qrup həmin xəstəxanada olub və indi oradan qayıdıblar. Bu
xəstə ilə bağlı müzakirələrimiz davam edir və müvafiq tövsiyələr
hazırlanır.
Artıq təxminən 86 nəfər təmasda olan şəxs müəyyən olunub. Lakin
təmasda olanların sayı daha çoxdur. Həmin bələdiyyənin İctimai
Səhiyyə Mərkəzi bunun üzərində çalışır”, – Amiran
Qamkrelidze deyib.
Xəstəliklərə Nəzarət Milli Mərkəzinin direktorunun sözlərinə görə,
virusa yoluxmuş şəxsin müalicə olunduğu xəstəxana karantin rejiminə
keçib.
“Geo Hospitals”-ın kliniki direktoru “Marneuli” radiosu ilə söhbəti
zamanı bildirdi ki, xəstəxananın tibbi personalı karantinə
aparılıb, lakin neçə nəfərin aparıldığını dəqiq bilmir. Onun
sözlərinə görə, xəstə güman ki, Azərbaycanda olub, lakin bunu
həkimlərdən gizləyib. Koronavirusa yoluxmuş şəxsin Azərbaycanda
olduğu barədə həkimlərə onun yaxınları məlumat verib.