Rusiya prezidenti Vladimir Putinin əmri ilə Rusiya silahlı
qüvvələri 24 fevral tarixində Ukraynaya hücum etdi.
Artıq 7 aydır ki, müharibə davam edir. Müharibə zamanı əsgərlərini
itirən Vladimir Putin 20 sentyabr tarixində qismən səfərbərliyin
elan ediləcəyi ilə bağlı fərman imzaladı.
Rusiya prezidentinin səfərbərlik fərmanından sonra Rusiya
vətəndaşları ölkəni tərk edərək viza tələb olunmayan qonşu ölkələrə
axın etməyə başladılar. Onların üz tutduğu ölkələrdən biri də
Gürcüstandır.
Müharibənin ilk başladığı günlərdən Ukrayna vətəndaşları ilə
birlikdə Gürcüstana gələn rus vətəndaşlarının da sayı az deyildi.
Onlar daha çox Tbilisi və Batumiyə yerləşirdilər. Son günlərdə isə
Rusları Marneulidə də görmək mümkündür. Bu gün, 27 sentyabr
tarixində Marneuli sakinlərinin ölkəyə çox sayda Rusiya
vətəndaşlarının gəlməsinə münasibətini öyrənmək məqsədilə sorğu
keçirdik.
Marneulililərin sözlərinə görə, Gürcüstan və onun vətəndaşları
qonaqpərvərdirlər. Sakinlər Gürcüstanlıların öz düşmənlərini qonaq
edəcək qədər qonaqpərvər olduqlarını vurğuladılar.
Onlar bildirirlər ki, Rusiya vətəndaşlarının Gürcüstana gəlməsi
nəticəsində ölkədə vəziyyət daha da gərginləşəcək. Sakinlərin
əksəriyyəti rusların burada yaşamalarının problemli olacağını və
bir sıra maddi çətinliklər yaşayacağını dedilər.
“Rahatlıq olsa, daha yaxşı olar və xalq təşvişə düşməz,
rahat olar”.
“Müharibəyə getmək istəmirlər. Mənim nəvəm də oradadır, gəlmək
istəyir, amma buraxmırlar. Orada yaşayan azərbaycanlıları, burada
kimlər doğulub onu buraxmalarını istəyərdim”.
“Rus bizə qarşı çox pis münasibət göstərir. Hamısı fəhlədir, onlar
müharibə etmə istəmirlər. Onlar qaçqın adı ilə gəlirlər ki, özləri,
uşaqları sağ qalsınlar, ölməsinlər. Evlərini qoyub gəlirlər”.
“Pisdir, camaat orada işləyirdi. İndi müharibə dövrüdür. Hamı
qaçır, hərə bir tərəfə, pisdir. Dolanmaq çətindir. Oradan gələn
camaatın burada işi-gücü yoxdur. Orada yenə işləyib ailələrini
dolandırırdılar. Gəlib burada çətinlik, bahalıqdır. Dolanmamız
çətindir”.
“Onlar müharibə istəmirlər deyə axın edib gəlirlər. Heç
bir insan ölüm istəmir. Onlar bir-birinə qardaş kimidirlər. Ona
görə də gedib vuruşmaq istəmirlər. Bu normaldır, mən normal
baxıram. Gürcüstan problem içindədir. Aclıq olacaq, özümüz burada
iş-güc tapıb yaşaya bilmirik. Bunlar da üstümüzə gəlir. Qafqazlılar
qonaqpərvərdirlər. Bizim qapımız yaxşı olan hər adama açıqdır. Amma
gərək biz özümüz də yaxşı yaşayaq. Mən onu demək istəyirəm ki, biz
gör nə gözəl xalq, dövlətik ki, hətta öz düşmənimizə də qapımız
açıqdır. Düşmənimiz bizim üstümüzə gəlir. Biz yenə onu qəbul
edirik. Yəni bu millət başa düşməlidir ki, keçmiş SSR dövlətləri
ilə, qonşu ilə pis münasibətin axırı budur. Bu gün düşmən bizim
qapımıza gəlir. Hansı ki, biz ora gedəndə əcnəbi deyir, artıq-əskik
deyirlər, niyə gəlibsiniz deyirlər?! Axı sizin öz torpağınıza nə
olub?! Adımızı da “qara” qoyublar. Bu gün dəmir qapının taxta
qapıya da işi düşür. Bizim taxta qapımız onlar üçün açıqdır. Amma
bizim 20% torpağımız onların sayəsində, onların ordusunun,
prezidentinin sayəsində zəbt olunub. Onlar düşünsünlər ki, kimlə
müharibə etmək lazımdır, kimdir bunun dostu, qonşusu, kimdir bunun
düşməni. Rus milləti belə şeyləri bir az ayıra
bilmir”.
“Öz torpaqlarını buraxıb bura gəlirlər. Əlbəttə,
Gürcüstan hər zaman qonaqpərvərdir, qonaqpərvər xalqdır, ölkədir.
Amma torpağını qoyub hara gəlirsən?! Gedin, müharibənizi edin,
torpağınızı azad edin! Dövlətiniz nə deyir, onu edin. Sabah
Gürcüstan müharibə edəndə biz Gürcüstanı qoyub gedərik?! Yox,
Gürcüstan bizim vətənimizdir. Vətənimizi də qoruyacağıq. Onlar
burada qeydiyyatda deyillər, pulları olmayan nə etməlidir?! Pulu
olmayanlar oğurluq edə bilərlər. Gərək dövlət qeydinə qala,
sığınacaq verə”.
27 sentyabr tarixinə olan məlumata əsasən, Rusiya-Gürcüstan
sərhədini keçmək istəyən avtomobillərin sayı 5 500-ə çatıb.
Bunlardan 3 600-ü minik avtomobilləri, 1 900-ü tranzit hərəkət edən
yük avtomobilləridir. Yük avtomobillərinin 600-ü nəzarət-keçid
məntəqəsindədir. Gürcüstanın Daxili İşlər Naziri Vaxtanq
Qomelaurinin sözlərinə görə, Lars keçid məntəqəsinə 26 sentyabra
qədər 11 mindən çox, 26 sentyabrda isə 10 mindən çox Rusiya
vətəndaşı daxil olub. O, bu sayın irəliləyən günlərdə daha da
artacağının ehtimal edildiyini bildirib.
Artıq bir neçə gündür ki, Rusiya-Gürcüstan sərhədində bir neçə
kilometrlik tıxac yaranıb.
Rusiya prezident administrasiyası tərəfindən verilən məlumata görə,
“qismən səfərbərlik” elan edildikdən sonra Rusiyanı 261 min insan
tərk edib.