Marneuli yerli özünüidarəsi 2023-cü il ərzində mədəniyyət sahəsinin
inkişafına 2 545 000 lari xərcləyəcək.
Meriyanın büdcəsinə əsasən, mədəniyyət sahəsinin inkişaf proqramı
üçün ayrılmış vəsait üç istiqamətdə bölünəcək. Bu istiqamətlər –
mədəniyyət sahəsi müəssisələrinə dəstək, mədəniyyət sahəsi
tədbirləri və dini, yaxud başqa növ ictimai fəaliyyətlərdir.
Qeyd olunan üç istiqamətdən ən çox pul – 1 850 000 lari Marneuli
Mədəniyyət Mərkəzinin maliyyələşdirilməsinə ayrılıb. Mədəniyyət
sahəsi müəssisələrinə dəstək bəndində qeyd olunan məlumata görə,
müxtəlif mədəni fəaliyyətlər təşkil olunacaq, o cümlədən şəhər və
ölkə üçün əlamətdar olan tarixlər qeyd olunacaq.
“Şəhər əhalisi və ya qonaqlar üçün rəngarəng görüntülərin təklif
edilməsi, Mədəniyyət Mərkəzinin maddi-texniki bazasının təminatı və
maksimum dəstək göstərilməsi. Əməkdar vətəndaşların keçdiyi yolun
ümumiləşdirilməsi və qiymətləndirilməsi (yubileylər, görüşlər, anım
tədbirləri və s.). Gürcü mədəniyyətinin tanıdılması və Marneulinin
bu mədəni ənənələrin daşıyıcısı olan şəhər kimi ölkədən kənarda,
regionda tanıdılması. Şəhərdəki diasporaların şəhərin mədəni
həyatına qoşulması və birlikdə tədbirlərin təşkil edilməsi.
Marneuli Bələdiyyəsi ərazisində mədəni-maarif müəssisələrinin
fəaliyyətinin əlaqələndirilməsi və köməklik göstərilməsi, incəsənət
sahələrinin inkişafına dəstək, məşhurlaşdırılması. Sosial baxımdan
mühüm layihələrin, müxtəlif istiqamətlərdə yaradıcılıq
fəaliyyətlərinin təmin edilməsi. Fərdi ifaçıların və yaradıcı
kollektivlərin fəaliyyətinə dəstək: musiqi, xoreoqrafiya, folklor,
rəsm və rəngkarlıq, klassik musiqi, teatr, müasir xoreoqrafiya,
foto sənəti, vokal-instrumental dərnəkləri, ədəbi klublar, gənc,
istedadlı, yerli yazıçıların fəaliyyətinin təbliği, onların
fəaliyyəti üçün şərait yaradılması, milli adətlərin tanıdılması,
gənc nəsilin demokratik ictimaiyyətin həqiqi vətəndaşları olaraq
yetişdirilməsi, formalaşdırılmasına dəstək, mədəni, sosial
özünüdərk, estetik inkişafın tamamlanması”, –
mədəniyyət sahəsi müəssisələrinə dəstək bəndində qeyd olunub.
Marenuli meriyası mədəniyyət sahəsi tədbirləri üçün 2023-cü ildə
275 000 lari xərcləyəcək. Bu pula Novruz bayramı, Yeni il konserti
və s. kimi tədbirlərin keçirilməsi üçün nəzərdə tutulmuş xərclər də
daxildir.
“Proqram konsert üçün müğənnilərin, səhnə və
işıqlandırma-səsləndirmənin icarəyə götürülməsini, onların
quraşdırılma-sökülməsini də nəzərdə tutur. Teatr tamaşaları üçün
geyimlərin alınması və ya icarəsi. Sərgi məkanlarının qurulması
məqsədi ilə ləvazimatların alınması. Marneulidə şərab günü adı ilə
“Marneuli üzüm beşiyi” tədbirinin keçirilməsi ənənə halını alıb.
Tədbir çərçivəsində müxtəlif payız ayinləri keçirilir. Mədəni irs,
turizm və maarifləndirmə istiqamərində fəaliyyətlər nəzərdə
tutulur”, – Mədəniyyət sahəsi tədbirləri bəndində
qeyd olunub.
Mədəniyyət sahəsinin inkişafına ayrılmış pula dini və ya başqa
tipli ictimai fəaliyyətlər üçün ayrılmış 420 000 lari də daxildir.
Qeyd olunan pulun böyük hissəsi – 400 000 lari, Marneuli və Hucabi
Yeparxiyasının maliyyələşdirilməsinə, 20 000 lari isə məscidlərin,
kilsə-monastırların kommunal xərclərinin maliyyələşdirilməsinə
ayrılıb.