Marneuli meriyasının son iki ildəki büdcəsinə əsasən, təhsilə ayrılan vəsait ildən-ilə artır.
Bələdiyyə tərəfindən ayrılan vəsaitin böyük hissəsi Uşaq Bağçası Birliyinə subsidiya vermək üçün sərf olunur. Uşaq Bağçaları Birliyi isə pulun böyük hissəsini əməkhaqlarına xərcləyir.
2023-cü il büdcəsində təhsilə 4 812 000 lari, 2024-cü il büdcəsində isə 5 922 000 lari ayrılıb. Marneuli meriyası hər il məktəb müəllimlərinin gediş haqqı üçün ümumilikdə 72 000 lari ayırır ki, bu da “Gürcü dili ikinci dil” müəllimlərinə bölünür.

2025-ci ilin büdcə layihəsi çərçivəsində təhsilə 7 072 000 lari ayrılıb. Qeyd olunan vəsaitdən 7 000 000 lari uşaq bağçaları birliyinə ayrılıb.

“Bələdiyyə üzrə ümumilikdə 3000 məktəbəqədər yaşlı uşaq qeydiyyatdadır. Ərazidə yerləşən 14 uşaq bağçasında 2749 uşaq var, onlardan 1161 qız, 1373 oğlandır. 251 uşaq isə müvafiq xidmətlərdən yararlana bilmir. Bələdiyyə ərazisində fəaliyyət göstərən 14 uşaq bağçası var və onların fəaliyyəti Uşaq Bağçaları Birliyi tərəfindən təmin edilir” - 2025-ci ilin büdcə layihəsində qeyd olunub.

Marneulidə fəaliyyət göstərən 14 uşaq bağçası aşağıdakı ünvanlarda yerləşir:

1. 1 saylı uşaq bağçası, ünvan: Marneuli İkinci Erekle küç. #21;
2. 3 saylı uşaq bağçası, ünvan: Marneuli May küç. #26;
3. 4 saylı uşaq bağçası, ünvan: Marneuli Rustaveli küç. #77;
4. Tsereteli kənd uşaq bağçası, ünvan: Marneuli, Tsereteli kəndi;
5. Saimerlo kənd uşaq bağçası, ünvan: Marneuli, Simerlo kəndi;
6. Qızılhacılı kənd uşaq bağçası, ünvan: Marneuli, Qızılhacılı kəndi;
7. Tamarisi kənd uşaq bağçası, ünvan: Marneuli, Tamarisi kəndi;
8. Şaumyan erməni uşaq bağçası, ünvan: Marneuli, Şaumyan kəndi;
9. Şaumyan yeni uşaq bağçası, ünvan: Marneuli, Şaumyan kəndi;
10. Şulaveri uşaq bağçası, ünvan: Marneuli, Şulaveri kəndi;
11. Xixani uşaq bağçası, ünvan: Marneuli, Xixani kəndi;
12. Kəpənəkçi kənd uşaq bağçası, ünvan: Marneuli, Kəpənəkçi kəndi;
13. Marneuli, Algeti kənd uşaq bağçası – Marneuli, Algeti kəndi;
14. Marneuli, Sadaxlı kənd uşaq bağçası – Marneuli, Sadaxlı kəndi;

2025-ci ilin büdcə layihəsinə əsasən, məktəbəqədər təhsil müəssisələrində 68 müəllim, 68 köməkçi olmaqla, ümumilikdə 350 işçi işləyir. 2025-ci il büdcəsindən ayrılan 7 000 000 laridən 5 632 600 lari bağça işçilərinin əməkhaqqına xərclənəcək.

Marneuli bələdiyyəsinin 2025-ci il büdcə layihəsinin ictimai müzakirəsi zamanı Marneuli meriyasının nümayəndələri “Marneuli” radiosunun suallarını cavablandırıblar. Meriyanın Maliyyə və Büdcə xidmətinin rəhbəri Koba Çxitunidzenin sözlərinə görə, yeni uşaq bağçalarının tikintisi Marneuli meriyasının səlahiyyətinə aid deyil.

“Yeni uşaq bağçalarının tikintisi üçün lazım olan xərcləri hökumət ayırır. Biz artıq təmir və istismar xərclərini qarşılayırıq. Yemək xərcləri, işçilərin maaşları, inventar, kommunal xərclər və s. Biz ancaq bu xərcləri qarşılayırıq” - Koba Çxitunidze bildirib.

Büdcənin ictimai müzakirəsi zamanı meriyanın İctimaiyyətlə Əlaqələr Xidmətinin rəhbəri Davit Çikadze də bildirib ki, indiki mərhələdə bələdiyyədə 3 yeni uşaq bağçasının tikintisi davam etdirilir, ümumilikdə gələn illər ərzində 10 yeni uşaq bağçasının tikintisi nəzərdə tutulub.

Vətəndaş İştirakı və Aktivizm Mərkəzinin rəhbəri Rəşan Ziyadəliyev “Marneuli” radiosu ilə söhbəti zamanı bildrir ki, kəndlərdə uşaq bağçalarının, mədəni-yaradıcılıq məkanlarının olması vətəndaşların siyasi həyata cəlb olunmasında, fəallaşmasında böyük rol oynayır. Ziyadəliyevin sözlərinə görə, Marneuli bələdiyyəsində uşaq bağçalarının sayının artırılması vacibdir.

“İlk növbədə qeyd etmək lazımdır ki, yerli özünüidarənin həyata keçirilməsi üçün vətəndaşların cəlb olunması vacibdir. Marneuli meriyasında, Bələdiyyə Məclisində büdcə vətəndaşların fəal iştirakı ilə təsdiqlənməlidir. Bundan əlavə, Bələdiyyə Məclisi, meriya kənd səviyyəsində kənd yığıncaqlar keçirməlidir, yerli ehtiyacları müzakirə etməlidir, lakin bu il belə görüşlərə rast gəlmədik. Təəssüf ki, bələdiyyədə uşaq bağçası problemi hələ də var və daha çox uşaq bağçası tikmək lazımdır” - Rəşan Ziyadəliyev bildirir.

Kəndlərdə uşaq bağçalarının olması bir neçə cəhətdən yaxşı ola bilər. Birincisi, uşaqların məktəbə hazır olması üçün zəruri ilkin şərtdir, ikincisi, kəndlərdə uşaq bağçasının olması valideynlərin fəallaşmasına, ictimai-siyasi həyatda iştirakına töhfə verə bilər. Rəşan Ziyadəliyevin sözlərinə görə, demokratik dövlət quruculuğunda vətəndaşların yerli özünüidarəetmə proseslərində iştirakının artırılması vacibdir.
Vətəndaşların fikirlərini nəzərə almaq və müxtəlif mövqelərin qəbulunu artırmaq üçün etnik azlıq və çoxluq arasında inteqrasiyanın gücləndirilməsi vacibdir.

“Etnik azlıqların inteqrasiyası üçün etniklərarası dialoq üçün mədəni tədbirlərin həyata keçirilməsi birbaşa vacibdir. Məsələn, bir çox mədəni tədbirləri Marneuli meriyası tərəfindən maliyyələşdirilən Marneuli Mədəniyyət Evi həyata keçirməlidir. O da vacibdir ki, belə tədbirlər təkcə Marneulidə və ya konkret bir kənddə deyil, bir çox yaşayış məntəqələrini, o cümlədən ucqar kəndləri əhatə etməlidir”. - Rəşan Ziyadəliyev bildirir.

Marneuli yerli özünüidarəetməsi mədəniyyət sahəsinin inkişafı üçün 2025-ci il büdcəsində 4 186 300 lari nəzərə alıb. Qeyd olunan vəsaitin 2 771 300 larisi Marneuli “Mədəniyyət Mərkəzi”-nin subsidiyası olacaq, 480 000 lari mədəniyyət sahəsində yeni il konserti, “Marneuloba”, Novruz bayramı və s. kimi tədbirlərin təşkili üçün nəzərdə tutulub. Marneulidə mədəniyyət obyektlərinin saxlanması və bərpası üçün 515 000 lari ayrılıb.

22 noyabr tarixində Marneulinin 2025-ci il büdcə layihəsinin müzakirəsi zamanı “Marneuli” radiosu meriya nümayəndələrindən etnik azlıqların inteqrasiyası üçün büdcəyə hansı vəsaitin daxil olduğunu soruşub. Meriyanın Maliyyə-Büdcə Xidmətinin rəhbəri Koba Çxitunidze bildirib ki, vətəndaşların cəlb olunmasını gücləndirmək üçün büdcədən 20 000 lari ayrılıb.

“Həmin proqrama əsasən, gürcü, azərbaycan və erməni dillərində məlumat flayerləri çap olunur ki, onlar bələdiyyədə həyata keçirilən büdcə və müxtəlif layihələr haqqında məlumat əldə etsinlər” - Koba Çxitunidze bildirib.

Marneuli yerli özünüidarəsinin inteqrasiyanın təşviqi üçün büdcədə ayrıca ayrılmış lazımi vəsaiti yoxdur. Marneuli Bələdiyyə Məclisi 19 dekabr tarixində 2025-ci ilin büdcəsini təsdiqləyib. Büdcə təsdiqlənəndən sonra mədəniyyət və təhsilə ayrılan vəsait dəyişə bilər.