Qızılhacılı kəndində Bələdiyyə Məclisi deputatı ilə vətəndaş arasında baş verən qarşıdurmada majoritar deputat

Ceyhun Çoydarovun tənqidə görə kişinin üzərinə çay töküb fiziki hərəkətə keçməsindən sonra Kvemo Kartli qubernatoru Levan Xarabadze vətəndaşlarla görüşə gəlib.

Qubernator Qızılhacılı kəndində iki görüş keçirib – Bələdiyyə Məclisinin majoritar deputatının fəaliyyətindən narazı və razı olan insanlarla. Hər iki görüşdə vətəndaşlar hakimiyyətin və “Gürcü arzusu”nun tərəfdarı olduqlarını bildiriblər.

Levan Xarabadze vətəndaşlarla gürcü dilində danışmağa başlayıb, görüşdə tərcüməçi də var idi, lakin tərcüməçidən narazı qalan qubernator vətəndaşlarla rus dilində söhbəti davam etdirmək qərarına gəlib – hər iki görüşdə azərbaycandilli əhali ilə gürcü dilli qubernator arasında dialoq rus dilində aparılıb.

Merin nümayəndəsi və Bələdiyyə Məclisinin majoritar deputatının fəaliyyətindən narazı olan vətəndaşlarla görüşdə Qızılhacılı sakinləri kənddə həyata keçirmək istədikləri infrastruktur layihələrinin adını çəkiblər. İçməli su, yollar, küçələrin işıqlandırılması – yerli əhalinin dilə gətirdiyi əsas problemlər bunlar olub.

"Kəndimizdə su yoxdur. Sakinlər su alır. Qubernatordan soruşuram ki, kəndimiz çox pis vəziyyətdədir, biz Afrika kimiyik. Nə işıq, nə işıqlandırma, nə də yol var. Bu deputat və merin kənddəki nümayəndəsi tamamilə yararsızdır. Burada merin, Bələdiyyə Məclisi sədrinin günahı yoxdur. Bizim kəndin deputatı və merin kəndimizdəki nümayəndəsinin günahıdır. 8 ildir ki, deputat orada oturub, heç bir problemi həll etməyib, zəhmət olmasa, tezliklə deputatlığa yaxşı namizəd təklif edin”, – vətəndaşlardan biri bildirib.

Əhali ilə ikinci görüşdə qubernator vətəndaşlara müraciət edərək kəndin infrastruktur problemlərindən artıq məlumatlı olduğunu və içməli su layihəsinin 2025-ci ilin sonunadək başa çatdırılmasının nəzərdə tutulduğunu, bundan sonra kənddə yolların çəkilməsinə başlanılacağını bildirib.

Marneuli Bələdiyyə Məclisinin üzvü, Qızılhacılıdan olan majoritar deputat Ceyhun Çoydarov tərəfdarlarının iştirak etdiyi ikinci görüşdə əsasən keçmiş məktəb direktoru və özünün dediyi kimi kənd ağsaqqalı dövlət nümayəndəsinə müraciət edib və qubernatora deyib: “İndi hökumət onun (Ceyhun Çoydarovun) namizədliyini irəli sürsə, onu seçə bilərik, amma hökumət başqa namizəd irəli sürərsə, hamı ona da səs verəcək”.

"Bu kəndi iki yerə bölmək olmaz. Ora toplaşanlar da hökuməti dəstəkləyən insanlardır, biz də burada hakimiyyətin adamlarıyıq. İstər onlar, istərsə də biz – hamı “Gürcü Arzusuna” səs verəcək. Sadəcə olaraq, insanları belə düşərgələrə bölməyə ehtiyac yoxdur", – keçmiş direktor bildirib.

Kvemo Kartli qubernatoru vətəndaşa açıqlığına görə təşəkkür edib və namizəd irəli sürmək üçün əhali ilə görüşmədiyini qeyd edib. O, vətəndaşlarla tanış olmaq, onların problemlərini dinləmək üçün gəldiyini və majoritar namizədin kimliyinin yaxın vaxtlarda məlum olacağını bildirib.

Vətəndaşlarla görüşdə Marneulinin digər yüksək vəzifəli şəxsləri iştirak etməyib. Mer Kənan Ömərov və onun müavinləri, Bələdiyyə Məclisinin sədri Amiran Qiorqadze və müavinləri qubernatorun Qızılhacılı sakinləri ilə görüşündə iştirak etməyiblər.

Xatırlatmaq istərdik ki, iyulun 14-də “Gürcü Arzusu” partiyasının Bələdiyyə Məclisinin deputatı Ceyhun Çoydarov Qızılhacılı kəndinə yerli kişilərlə görüşüb. Görüşün əvvəlində yerli sakinlərdən biri onun ünvanına tənqidi fikir bildirib və Çoydarov cavab olaraq onu oliqarx adlandırıb. Sonra söyüb. Bundan sonra Çoydarov həmin adamın üstünə atılaraq stolun üzərinə əşyalar atıb və dava düşüb.

Ceyhun Çoydarov əvvəllər də bir neçə münaqişədə iştirak edib. Ən son, 26 oktyabr 2024-cü il Parlament seçkiləri günü Qızılhacılıdakı seçki məntəqələrinin birində Milli Hərəkat partiyasının üzvü Azad Kərimova hücum edib. Hadisə ilə bağlı hələlik istintaqa başlanılmayıb.

Ceyhun Çoydarov 2017-ci il oktyabrın 20-də “Gürcü Arzusu”nun ofisi yaxınlığında yaralanıb. O və bir neçə nəfərə odlu silahdan atəş açılıb. Çoydarov partiyanın majoritar namizədi olub və insident yerli seçkilərə bir neçə gün qalmış baş verib. Seçki dövründə o, hələ də xəstəxanada idi və müalicə alırdı.

Əsas şəkil: "Aktual.ge"

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---