Gürcüstanda yerli özünüidarəetmə seçkiləri yaxınlaşır.

Müxalifətin bir hissəsi seçkiləri boykot edir və iştirak etməyi planlaşdırmır. “Qaxariya – Gürcüstan naminə” və “Lelo” partiyaları isə seçkilərdə iştirak edəcəklərini açıqlayıblar.

Marneulili siyasətçi Əhməd İmamquliyevdən bu il hər hansı partiyaya qoşulub-qoşulmayacağı və mer vəzifəsinə namizədliyini irəli sürüb-sürməyəcəyi ilə bağlı münasibətini öyrəndik.

Əhməd İmamquliyev “Marneuli” radiosu ilə söhbəti zamanı bildirdi ki, hazırda onun planlarında nə mer vəzifəsi, nə də hər hansı siyasi partiyaya üzvlük məsələsi var:

“Gündəlik planımda hansısa partiyadan mer seçkilərində iştirak etmək məsələsi yoxdur. Ölkədə bu gün baş verən vəziyyəti yaxşı bilirsiniz. Mən daha çox düşünürəm ki, əgər Parlament seçkiləri ilə eyni vaxtda yerli seçkilər də keçirilsə, o zaman ya namizəd kimi, ya da sıravi siyasətçi kimi iştirak etmək mümkündür ki, bugünkü kabusu – “Gürcü Arzusu”nu məğlub edək.”

Əhməd İmamquliyevə hakim partiyanın Marneuli üzrə merliyə namizədi ilə bağlı məlumata malik olub-olmadığı da soruşuldu. Həmçinin ona hazırkı mer Kənan Ömərov barədə də sual verdik.

İmamquliyevin ehtimalına görə, Kənan Ömərovun ikinci müddətə namizədliyi irəli sürülməyəcək. O, konkret ad çəkməsə də, bildirdi ki, “Gürcü Arzusu” Marneuli merliyinə gənc, yerli bir şəxsi – “kapitandan mayorluğa yüksəltmək istədikləri” bir namizədi təqdim edəcək:

“Mənim mənbələrimə əsasən, bu nə Kənan Ömərovdur, nə də Zaur Darğallı. Bu, “Gürcü Arzusu” daxilində üçüncü bir qanaddır. Namizəd etnik azərbaycanlı, marneulili olacaq – söhbətlər bu yöndədir. Gənc bir oğlandır. Belə deyə bilərəm: onu “kapitanlıqdan mayorluğa” keçirmək istəyirlər. Yəqin ki, bu şəxs bələdiyyə üzvü deyil. Səhv etmirəmsə, “Gürcü Arzusu”nun sıralarında çalışıb. Mənim mövqeyim ondan ibarətdir ki, yerlərin dəyişməsi ümumi nəticəni dəyişmir. Kim olursa-olsun, bu, “Gürcü Arzusu”na və Bidzina İvanişviliyə xidmət edən bir marionet olacaq”, - Əhməd İmamquliyev dedi.

Qeyd edək ki, Gürcüstanda yerli özünüidarəetmə seçkilərinin 4 oktyabrda keçirilməsi planlaşdırılır. Sonuncu dəfə merlər 2021-ci ildə seçilmişdi.

 

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---