Bidzina İvanişvilinin keçmiş şəxsi maliyyəçisi və müşaviri, hazırda beynəlxalq axtarışda olan Giorgi Baçiaşvili Britaniyanın

The Guardian nəşrinə verdiyi müsahibədə bildirib ki, həyatına təhlükə var. O, iki ölkənin xüsusi xidmət orqanlarından aldığı məlumata əsasən, onun öldürülməsi üçün konkret göstərişin verildiyini deyir.

“Dedilər ki, bu sadəcə ehtimal deyil — artıq göstəriş verilib. Söhbət Şimali Qafqazdan gələn qruplardan gedir, ehtimal ki, çeçenlərdən”, — deyir Baçiaşvili. Onun sözlərinə görə, bu planın arxasında birbaşa İvanişvili dayanmır, lakin belə ehtimalı tamamilə istisna etmir.

Onun vəkili Robert Amsterdam da qeyd edir ki, Baçiaşvilinin öldürülməsi ilə bağlı plan xarici dövlətlərin xüsusi xidmət orqanlarının Gürcüstanda sabitliyi pozmaq məqsədilə hazırladığı ssenari ola bilər.

Qaçışın detalları

Baçiaşvili Gürcüstanda izlənildiyi dövrdə planlaşdırdığı qaçış haqqında ətraflı danışır:

O, aylarla Kaxetidə səfərlər edərək izləyənləri bunun adi vərdiş olduğuna inandırmışdı;

2 martda sürücüsünə və mühafizəçisinə Kaxetidə getmək istədiyini deyib, lakin yolda avtomobildən düşərək jurnalistlə gizli görüşə gedib;

Öz izini itirmək üçün mobil telefonunu avtomobildə qoyub;

İddialara görə, içində gizli bölməsi olan Toyota Camry markalı maşınla Ermənistan sərhədinə gedib və oradan Qətərə uçub;

Hal-hazırda xaricdə olduğu bildirilir, lakin dəqiq yeri təhlükəsizlik baxımından açıqlanmır.

Bidzina İvanişvili — Baçiaşvilinin gözü ilə

Baçiaşvili İvanişvilinin şəxsi xüsusiyyətlərini və maraqlarını belə təsvir edir:

“Əgər bir şeyi sahiblənməyibsə, onu sevə bilməz — bu, onun dünyagörüşüdür,” — deyir o. Baçiaşvilinin sözlərinə görə, İvanişvili nadir heyvanlar və nadir ağaclar toplayır, o cümlədən zebr, tovuz quşu və yüzillik ağaclar. “Ağacları həyat enerjisinin mənbəyi hesab edir.”

O bildirir ki, İvanişvili ölüm ideyası ilə bağlı obsesiyaya malikdir və ölümsüzlük arzusu ilə yaşayır. Baçiaşvili onun kök hüceyrə transplantasiyası da daxil olmaqla bir sıra eksperimental prosedurlardan keçdiyini və voodoo-ya bənzər mistik praktikalarla məşğul olduğunu qeyd edir.

Bu kontekstdə o, Rusiyalı şəfaçı kimi tanınan Yuliya Kruşanovanı xatırladır. Onun sözlərinə görə, Kruşanova İvanişvili ilə birlikdə yaşayır və Rusiya təhlükəsizlik xidmətinin əməkdaşı ilə evlidir. İvanişvilinin vəkili isə bu iddiaları “absurd” adlandırır və bildirir ki, onunla heç bir həkim yaşamır və heç bir “okkult” prosedur aparılmır.

Sabiq baş nazirlərlə münasibət

Baçiaşvili həmçinin qeyd edir ki, İvanişvilinin Gürcüstanın müxtəlif baş nazirləri ilə münasibəti “əsəbi rəhbər və itaətkar işçi” modelinə bənzəyirdi.

The Guardian məqaləsinin başlığı: “Həbsxanada öləcəyimi bilirdim — Gürcüstanın de-fakto liderinin sağ əli necə qaçqın oldu”.

Bu müsahibə Baçiaşvilinin ilk dəfə ictimai şəkildə sui-qəsd hədələri və qaçış planı haqqında danışmasıdır. Lakin əsas vurğu Bidzina İvanişvilinin siyasi, şəxsi və psixoloji portretinə yönəlib — o, təkcə insanları və təbiəti deyil, hətta öz ölümünü də idarə etmək istəyən bir fiqur kimi təqdim olunur.

 

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---