"Gürcü Arzusu” partiyasının baş naziri İrakli Kobaxidze Finlandiyanın xarici işlər naziri və ATƏT-in fəaliyyətdə olan sədri Elina Valtonenin Gürcüstana səfərini şərh edib. Kobaxidzenin sözlərinə görə, o, Valtonenlə planlaşdırılmış görüşü ləğv edib, çünki finlandiyalı nazir Rustaveli prospektində keçirilən etiraz aksiyasında görünüb.

Kobaxidze etirazçılar barədə əvvəllər istifadə etdiyi “Akatsuki” ifadəsini Valtonenə də aid edib:

“Təsəvvür edin, Finlandiyanın xarici

işlər naziri gəldi. Biz onunla görüşmədik, çünki 50 Akatsukinin aksiyasında 51-ci Akatsuki kimi dayandı. Belə bir insanla necə görüşmək olar?! O dedi ki, mən Finlandiyanın xarici işlər naziri deyiləm, Akatsukiyəm. Biz də görüşmədik, çünki Akatsuki ilə danışıqların mənası yoxdur. Biz Finlandiyanın xarici işlər naziri ilə danışmaq istəyirdik, amma nəticədə əlimizdə Akatsuki qaldı,” – deyə Kobaxidze bildirib.


Elina Valtonen Gürcüstana rəsmi səfərlə gəlmişdi, vətəndaş cəmiyyətinin nümayəndələri və “Gürcü Arzusu” partiyasının üzvləri, o cümlədən xarici işlər naziri Maka Boçorişvili ilə görüşlər keçirmişdi.

Bundan sonra o, nümayəndə heyəti ilə birlikdə Rustaveli prospektində keçirilən etiraz aksiyasına da qoşulub və daha sonra sosial şəbəkə X-də (Twitter) aksiya iştirakçılarına dəstək videosu paylaşmışdı.

Bundan sonra hökumət administrasiyası bəyanat yayaraq bildirdi ki, “qanunsuz mitinqdə iştirakı və yalan bəyanatlarına görə, İrakli Kobaxidze Finlandiya xarici işlər naziri ilə planlaşdırılmış görüşü ləğv edib.”

Daha sonra Finlandiyanın Helsingin Sanomat nəşri yazdı ki, Valtonen özü görüşü ləğv etmək qərarını Bakıda, Azərbaycan prezidenti ilə görüşü zamanı vermişdi.

Səfərin sonunda Gürcüstan Daxili İşlər Nazirliyi Valtoneni “yolun bağlanması” səbəbi ilə 5000 lari cərimə edib, Xarici İşlər Nazirliyi isə ATƏT-ə etiraz notası göndərib.


“Akatsuki” nədir?

“Akatsuki” – yapon “Naruto” anime və manqa seriyasında əsas düşmən təşkilatının adıdır. Bu təşkilat güclü, cinayətkar və dağıdıcı ninja qaçaqlardan ibarətdir, məqsədləri dünya nizamını zorla dəyişməkdir.

*"Naruto" (Naruto) dünyada ən populyar Yapon manqası (komiks) və animesindən (cizgi serialı) biridir.

"Akatsuki" serialın əsas antaqonist (pis) təşkilatıdır. Bu, yüksək rütbəli, qaçqın ninzaların qrupudur.

Manqa nədir? Bu, komiksin Yapon versiyasıdır, ənənəvi olaraq qara-ağ rəsmlərlə çəkilir.*



Gürcü siyasətində “Akatsuki” termini 2023-cü ilin martında “xarici agentlər haqqında” qanun layihəsi ilə bağlı etirazlar zamanı hökumət tərəfindən etirazçılara qarşı istifadə olunmağa başlayıb. Bu söz etirazçıları “radikal, xaricdən idarə olunan və dağıdıcı qüvvə” kimi göstərmək məqsədi daşıyır.

İrakli Kobaxidzenin bu termini Finlandiya naziri Valtonenə də aid etməsi, hökumətin etirazlara dəstək verən hər kəsi — o cümlədən yüksək səviyyəli xarici diplomatları belə — “düşmən qüvvə” kimi göstərmək istədiyini göstərir.