Twitter-in sahibi, ABŞ milyarderi İlon Mask Rusiya Təhlükəsizlik Şurası sədrinin müavini, keçmiş prezident Dmitri Medvedevin “Ukraynanın yox olacağına” dair postunu silməkdən imtina etməsinin səbəblərini bildirib.

Medvedevin postunda deyilirdi ki, “Ukrayna yox olacaq, çünki o heç kimə lazım deyil...”

Twitter istifadəçiləri Maskı Rusiyanın anti-Ukrayna ritorikasına meydan verməkdə və beləliklə də Moskvaya qarşı sanksiyaları pozmaqda ittiham edirlər.

Mask bildirib ki, bu məsələdə seçimi adamların özləri etməlidirlər.

O habelə Rusiya hökumət strukturlarının Twitter hesablarını məhdudlaşdrmaqdan boyun qaçırır.

Mask onu ittiham edənlərə yazır:

"Bütün xəbərlər müəyyən dərəcədə təbliğatdır. Qoy adamlar özləri müstəqil qərar qəbul etsinlər... Putin Ukraynaya göstərdiyim köməyə görə məni hərbi cani adlandırıb. Odur ki, onu mənim heç də ən yaxşı dostum hesab etmək olmaz”.

İlon Mask əlavə edib ki, Twitter Rusiyanın hökumət hesablarını nə təbliğ edəcək, nə də məhdudlaşdıracaq:

"Senzura ilə, yalnız başqaları bundan istifadə edirlər deyə məşğul olmaq zəif gedişdir”.

Ötən ilin aprel ayında, Rusiyanın Ukraynaya müdaxiləsinin ardınca Twitter bəyan etmişdi ki, o azad informasiyaya çıxışı məhdudlaşdıran və ya dövlətlərarası münaqişələrdə iştirak edən dövlətlərin hökumət postlarını “reklam və tövsiyə etməyəcək”.

Şirkət qeyd edirdi ki, Rusiya hakimiyyətinə bağlılığı olan hesablar məhdudlaşdırılacaq.

Lakin Mask ötən ilin oktyabrında Twitter-i alandan sonra bildirmişdi ki, o bu sosial şəbəkədə daha geniş söz azadlığına imkan yaradacaq.

Bundan başqa keçmiş prezident Donald Trampın hesabı təkrar açılmışdı. Hərçənd Tramp artıq bu hesabdan istifadə etmir.

Bir sıra şərhçilər və siyasətçilər Maskın siyasətini kəskin tənqid edirlər.

Onlar bildirirlər ki, moderasiya siyasətinin bu sayaq dəyişdirilməsi yalnız dezinformasiya və nifrət hisslərini yayanlara əl verir.

Bununla yanaşı İlon Maskın özü də Ukrayna rəhbərliyi tərəfindən rusiyayönlü kimi qiymətləndirilən bir sıra bəyanatlar vermişdi.

Bundan əvvəl The Telegraph qəzeti xəbər vermişdi ki, Twitter Rusiya hakimiyyəti ilə bağlı hesabların üzərindən məhdudiyyətləri qaldırıb.

Twitter-də axtarışlar yenə də Kremlə, Rusiya Xarici İşlər Nazirliyinə gedib çıxır.

TASS bildirir ki, indi axtarış zamanı Rusiya Müdafiə Nazirliyinin hesabına da çıxmaq olur.