Azərbaycanın Ukraynaya qaz tədarükünə başlamaq qərarı açıq şəkildə Moskva ilə müharibə aparan Kiyevə dəstək məqsədi daşıyır. Bu barədə Rusiya Dövlət Dumasının MDB işləri üzrə komitəsinin sədr müavini Konstantin Zatulinin “Lenta.ru”ya müsahibəsində bildirilir. Deputat bu sözlərlə keçmiş sovet respublikaları arasında bağlanmış razılaşmanı şərh edib.

“Fikrimcə, artıq ən kar və kor adamlar da başa düşür ki, Azərbaycan öz

xətti ilə gedir və bu xətt bir sıra hallarda Rusiyanın maraqlarına düşməncəsinə ziddir. Bu, bir daha göstərir ki, Bakı Rusiyaya münasibətini nümayiş etdirmək üçün bəhanə və imkanlar axtarır”, – deyə Zatulin bildirib.

Deputatın sözlərinə görə, Azərbaycanda bu cür addımlar “çoxşaxəli siyasət” adlandırıla bilər. Lakin son dövrlərdə Rusiyanın mövqeləri ilə kəsişməyən vektorlar daha da güclənir və açıq şəkildə nümayiş etdirilir.

“Bu o demək deyil ki, Azərbaycan imkan olduqda Rusiya ilə münasibətlərdən mənfəət axtarmaqdan imtina edir. Bəli, o bunu edir. Amma Rusiya ilə mənfəət axtarışı Azərbaycanın siyasətində ikinci dərəcəli amildir. Əsas məqsəd özünü Rusiya ilə münasibətlərdə heç olmasa müttəfiq kimi deyil, neytral və ya soyuq mövqedə göstərməkdir. Azərbaycan özünü Rusiyanın düşmənləri ilə əlaqələrdə heç bir şəkildə məhdudlaşdırmır. Təəssüf ki, bizdə bunu hələ də hamı başa düşmür”, – deyə o əlavə edib.

Zatulinin fikrincə, Rusiyada baş nazir Mixail Mişustinin informasiya siyasəti sahəsində atdığı addımlar, xüsusən də TASS agentliyinin baş direktorunun birinci müavini vəzifəsindən Mixail Qusmanın azad edilməsi dəstəklənməlidir.

“Yoxsa, informasiya siyasətimizin nəticəsi olaraq elə təsəvvür yaranır ki, guya Azərbaycan İrana qarşı aqressiyanın əvvəlində bizim kino xadimlərinin oradan təxliyəsində çox böyük kömək göstərib. Bu, hamıya və hər yerdə danışılır. Halbuki, Azərbaycanın Buşerdəki atom elektrik stansiyasında çalışan rus mütəxəssislərin ailələrini ölkəyə buraxmaması barədə isə heç kim heç nə bilmir”, – deyə Zatulin sözlərini tamamlayıb.

Ukraynanın “Naftoqaz Ukrainı” milli səhmdar cəmiyyəti Azərbaycan Dövlət Neft Şirkəti (SOCAR) ilə qaz alqı-satqısına dair ilk müqavilə imzalayıb.

Məlumata görə, Bolqarıstan-Rumıniya-Ukrayna sərhədi marşrutu üzrə Trans-Balkan dəhlizi ilə ilk dəfə sınaq qaz təchizatı həyata keçirilir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---