ABŞ Dövlət Departamenti Azərbaycanla bu ölkə arasında bu il avqustun 8-də imzalanmış Anlaşma Memorandumunun mətni açıqlayıb.

Sənəddə qeyd edilir ki, Anlaşma Memorandumunun məqsədi iştirakçılar arasında Strateji Tərəfdaşlıq Xartiyasının altı ay müddətində hazırlanması üçün Strateji İşçi Qrupunun yaradılmasıdır.

Bildirildiyinə görə, iştirakçılar Strateji İşçi Qrupunda üç sahəyə diqqət yönəltmək niyyətindədirlər:

- Enerji, ticarət və tranzit daxil olmaqla

regional bağlantılar

- Süni intellekt və rəqəmsal infrastruktur daxil olmaqla iqtisadi sərmayələr

- Silah satışı və terrorizmlə mübarizə daxil olmaqla təhlükəsizlik sahəsində əməkdaşlıq.

Memorandum imzalandığı tarixdən qüvvəyə minir və bir il qüvvədə qalmalıdır. O, iştirakçıların qarşılıqlı yazılı razılığı ilə uzadıla bilər. Hər bir tərəf istənilən vaxt bu Memorandumda iştirakını dayandıra bilər. İştirakı dayandıran tərəf qarşı tərəfə diplomatik kanallar vasitəsilə 60 gün əvvəlcədən yazılı qaydada bildiriş verməlidir.

Həmçinin qeyd edildiyinə görə, iştirakçılar qarşılıqlı yazılı qərarla bu Memorandumu dəyişdirilə bilərlər.

Əlavə edilir ki, Memorandum beynəlxalq və daxili qanunvericilik üzrə heç bir hüquq və öhdəlik yaratmır. Tərəflərdən heç birinin üzərinə maliyyə öhdəliyi qoymur.

Elə bu gün, avqustun 29-da Yerevan da ABŞ-la imzaladığı Anlaşma Memorandumunun mətnini yayıb.

Bu ayın birinci 10 günlüyündə Azərbaycan və Ermənistan liderləri ABŞ-da səfərdə olublar.

Avqustun 8-də həmin memorandumlardan əlavə, Vaşinqtonda Azərbaycanla Ermənistan arasında sülh müqaviləsinin mətni də paraflanıb. İmzalanan bəyannamədə isə Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz əlaqə yaradacaq TRIPP marşrutundan söz açılır. Bu xəttin Ermənistanın suverenliyini, ərazi bütövlüyünü və yurisdiksiyasını qoruyub saxlayacağı bildirilir.

Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olub. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.

Son illər iki ölkə arasında müxtəlif formatlarda sülh danışıqları aparılırdı.

Mətnin sadə və qeyri-rəsmi Azərbaycan dilinə tərcüməsi

ANLAŞMA MEMORANDUMU

ABŞ Hökuməti ilə Azərbaycan Respublikası Hökuməti arasında
ABŞ və Azərbaycan Respublikası arasında Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılmasına dair

ABŞ Hökuməti və Azərbaycan Respublikası Hökuməti (bundan sonra birlikdə “Tərəflər” adlandırılacaq),
Aşağıdakı anlaşmalara gəliblər:

I. Məqsəd

Bu Anlaşma Memorandumunun (bundan sonra “Memorandum” və ya “MOU”) məqsədi Strateji İşçi Qrupunun yaradılmasıdır. İşçi qrupunun vəzifəsi 6 ay müddətində Tərəflər arasında Strateji Tərəfdaşlıq Xartiyasının hazırlanmasıdır. Bu Xartiya Tərəflər arasında strateji əlaqələrin gücləndirilməsinə yönəlik olacaq.

Tərəflər aşağıdakı üç əsas istiqamətdə fəaliyyət göstərməyi planlaşdırırlar:

Regional əlaqəlilik – enerji, ticarət və tranzit sahələri daxil olmaqla;

İqtisadi investisiya – süni intellekt və rəqəmsal infrastruktur da daxil olmaqla;

Təhlükəsizlik sahəsində əməkdaşlıq – müdafiə satışları və terrorizmə qarşı əməkdaşlıq daxil olmaqla.

II. Əməkdaşlıq Sahələri

Tərəflər aşağıdakı sahələr də daxil olmaqla bir sıra istiqamətlərdə əməkdaşlıq etməyi nəzərdə tutur:

Enerji investisiyalarının genişləndirilməsi və regional əlaqəlilik infrastrukturunun inkişafı;

Müdafiə və terrorizmə qarşı əməkdaşlığın gücləndirilməsi;

Regional iqtisadi və ticarət əməkdaşlığının irəlilədilməsi;

Süni intellekt sahəsində tərəfdaşlığın və rəqəmsal infrastruktur investisiyalarının inkişaf etdirilməsi.

III. Ümumi Qaydalar
1. Müddət

Bu Memorandum Tərəflər tərəfindən imzalandığı tarixdən qüvvəyə minir və bir (1) il müddətində qüvvədə qalır. Memorandum, Tərəflərin qarşılıqlı yazılı razılığı əsasında uzadıla bilər. Hər bir Tərəf, istənilən vaxt bu Memorandum çərçivəsində iştirakını dayandıra bilər. İştirakını dayandırmaq istəyən Tərəf, digər Tərəfə 60 (altmış) gün əvvəl diplomatik kanallar vasitəsilə yazılı bildiriş təqdim etməlidir.

2. Layihələrin Davamlılığı

Tərəflərin başqa qərarı olmadıqda, bu Memorandumun qüvvədən düşməsi, onun çərçivəsində artıq başlanılmış və tamamlanmamış layihələrə və fəaliyyətlərə təsir göstərmir.

3. Dəyişikliklər

Tərəflər bu Memorandumu yalnız qarşılıqlı yazılı razılıq əsasında dəyişdirə bilərlər.

4. Memorandumun Hüquqi Təsiri

Bu Memorandum heç bir beynəlxalq və ya daxili hüquqi öhdəlik yaratmır. Tərəflər açıq şəkildə təsdiqləyirlər ki, bu Memorandum maliyyə öhdəliyi hesab edilmir. Hər bir Tərəf özünəməxsus missiyasını, səlahiyyətlərini və maliyyə məsuliyyətini saxlayır.

Bu Memorandum çərçivəsində nəzərdə tutulan əməkdaşlıq hüquqi tərəfdaşlıq və ya digər hüquqi şəxsiyyətin yaradılması kimi şərh edilmir. Hər bir Tərəf, bu Memorandumla bağlı çəkdiyi bütün xərcləri öz üzərinə götürür.

Tərəflər bu Memorandumu, tərəflər arasında əvvəllər mövcud olmuş və ya gələcəkdə bağlanacaq digər sazişlərə mane olmadan həyata keçirməyi planlaşdırırlar. Bu Memorandum heç bir eksklüziv əməkdaşlıq münasibəti yaratmır.

Bu Memorandum 8 avqust 2025-ci il tarixində, Vaşinqton şəhərində ingilis dilində hazırlanmış iki orijinal nüsxədə imzalanmışdır.

ABŞ Hökuməti adından Azərbaycan Respublikası Hökuməti adından

Mənbə: Azadlıq Radiosu

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---

 

---

Gürcüstanın hər yerindən olan 22 onlayn media birləşdik ki, gec olmadan mübarizə aparaq.
Bu mübarizədə sənin dəstəyin həlledicidir. https://sinatle.media/

Müstəqil onlayn medianı dəstəkləmək üçün ianə et:
# GE76TB7548536080100013
# GE70BG0000000609775306

Repressiv rejim müstəqil onlayn medianı yox etməklə hədələyir. Bu real təhlükəni göstərmək üçün 22 media qurumunun vebsaytı müvəqqəti olaraq dayandırıldı. Bu simvolik addım “İşıq sönməməlidir” kampaniyasından əvvəl həyata keçirildi. Kampaniyanın məqsədi müstəqil medianı qorumaq üçün dəstəkçiləri birləşdirməkdir.