Վրաստանում նախատեսվում է կառուցել 330 նոր մանկապարտեզ և վերականգնել
գործող 555 մանկապարտեզը։ Այս մասին հայտարարություն է տարածում
Վրաստանի կառավարությունը։
Կառավարության տվյալներով՝ մանկապարտեզների
կառուցապատման-վերականգնման ծրագիրը կիրականացվի մի քանի փուլով, իսկ
դրա համար բյուջեից կծախսվի 1,3 մլրդ լարի։ Ծրագիրը կիրականացվի
Տարածաշրջանային զարգացման և ենթակառուցվածքների նախարարության
Մունիցիպալ զարգացման հիմնադրամի կողմից։ Կառավարությունից հայտնում
են, որ առաջիկայում մրցույթներ կհայտարարվեն։
«Նոր ծրագրի շրջանակներում մանկապարտեզները կկառուցվեն ու
կվերականգնվեն ժամանակակից չափանիշներին համապատասխան։ Կկազմակերպվեն
փակ և բաց այգիներ, հանգստի գոտիներ, կոմունիկացիաներ և
սանհանգույցներ։ Այգիներն ամբողջությամբ կհարմարեցվեն հատուկ
կարիքներով մարդկանց համար։ Նախատեսվում է մանկապարտեզների
ենթակառուցվածքների զարգացումը՝ համաձայն ՏԻՄ-երի տրամադրած
տեղեկատվության և առաջնահերթությունների»,- ասված է կառավարության
հաղորդագրության մեջ։
Հայտարարության համաձայն՝ 2023 թվականի բյուջեով մանկապարտեզի ծրագրի
առաջին փուլի համար արդեն իսկ տրամադրվել է 100 մլն լարի։
"Ռադիո Մառնեուլի"
Թարգմ․ ՝ Մարգարիտա Միսկարյան