Վրաստանի Պետական անվտանգության ծառայությունը (ՊԱԾ) խոշոր չափի խարդախության փորձի փաստով Մառնեուլիի քաղաքապետարանի աշխատակցի և նրա հետ կապված մեկ անձի է ձերբակալել։

Լրացում․ ՊԱԾ-ում «Ռադիո Մառնեուլի»-ին հայտնել են, որ Ռիմա Օթարաշվիլիին չեն ձերբակալել․ նա դատավճռին կսպասի ոչ ազատազրկման խափանման միջոցի պայմաններում։

Այսօր՝ մարտի 9-ին, Պետական անվտանգության ծառայության տարածած տեղեկատվության համաձայն, Մառնեուլիի մունիցիպալիտետի քաղաքապետարանի վարչական ծառայության աշխատակիցը և մեկ քաղաքացի են ձերբակալվել։

Քննությամբ պարզվել է, որ Մառնեուլիի մունիցիպալիտետում գտնվող 20 000 քառակուսի մետր հողատարածքը մի քանի մասի բաժանելու և սահմանազատելու հարցը քաղաքապետարանում իբր դրական լուծելու դիմաց քաղաքապետարանի վարչական ծառայության աշխատակիցը և նրա վստահված անձը քաղաքացուց պահանջել են 60 000 ԱՄՆ դոլար, որից նախապես վերցրել են 5 000 ԱՄՆ դոլար։

Պետական անվտանգության ծառայության տարածած տեսագրությունում երևում է, թե ինչպես է քաղաքապետարանի վարչական ծառայության աշխատակից Ռիմա Օթարաշվիլին գումար վերցնում և քաղաքացուն 60 000 դոլարի դիմաց խոստանում գործի ամբողջական լուծում, նշելով, որ «այս գործի գլխավոր անձը կլինի քաղաքապետը»։

Քննությունը կատարվում է Վրաստանի քրեական օրենսգրքի 19-րդ և 180-րդ հոդվածներով, ինչը նախատեսում է 6-ից 9 տարի ազատազրկում։

"Ռադիո   Մառնեուլի"