Մառնեուլիի քաղաքապետարանը նախատեսում է 2026 թվականի ընթացքում ձեռք բերել հեռուստատեսային ծառայություններ, ինչի համար իրականացնում է շուկայի ուսումնասիրություն։

Քաղաքապետարանը հետաքրքրված թեկնածուներին կոչ է անում ներկայացնել առաջարկներ՝ ԱԱՀ-ն ներառյալ։

Մրցութային փաստաթղթերի համաձայն՝ գնումը ներառում է հանրության համար կարևոր տեղեկատվություն պարունակող աուդիովիզուալ հայտարարությունների պատրաստում և եթերում տեղադրում վրացերեն և ադրբեջաներեն լեզուներով։ Յուրաքանչյուր տեսանյութի տևողությունը պետք է լինի առնվազն 30 վայրկյան։

Ծառայությունների շրջանակում նախատեսվում է՝

• քաղաքապետի, նրա տեղակալների, ավագանու նախագահի, ԱԱԻՊ-ների ղեկավարների և տարբեր ծառայությունների ներկայացուցիչների հաշվետվությունների, բրիֆինգների և մամուլի ասուլիսների ուղիղ հեռարձակում,

• արտագնա և առցանց ակտիվությունների, սպորտային, մշակութային և կրոնական միջոցառումների, թատերական ներկայացումների և համերգների լուսաբանում,

• սակրոբուլոյի նիստերի և խորհրդակցությունների հեռարձակում վրացերեն և ադրբեջաներեն լեզուներով՝ առնվազն 10 րոպեանոց տևողությամբ,

• իմիջային տեսահոլովակների պատրաստում և եթերում տեղադրում՝ համայնքում իրականացված ենթակառուցվածքային, մշակութային, զբոսաշրջային, սոցիալական և սպորտային նախագծերի հանրահռչակման նպատակով։

Փաստաթղթի համաձայն՝ տարվա ընթացքում կպատրաստվի առնվազն երեք իմիջային տեսահոլովակ, որոնցից յուրաքանչյուրի տևողությունը կլինի առնվազն մեկ րոպե, և դրանք առնվազն մեկ անգամ կհեռարձակվեն եթերում։

Տեխնիկական պահանջների համաձայն՝ մատակարարը պետք է նաև ապահովի՝

• պատրաստված նյութերի տարածումը հեռուստաընկերության պաշտոնական կայքում և սոցիալական ցանցերում,

• համայնքային միջոցառումների ուղիղ հեռարձակում,

• հաղորդումների հասանելիությունը MyVideo.ge հարթակում,

• հեռուստաընկերության պաշտոնական YouTube ալիքի օպերատիվ թարմացում,

• ուղիղ եթերի տեխնիկական ապահովում և որակավորված անձնակազմի սպասարկում,

• ոչ աշխատանքային օրերին նախատեսված միջոցառումների նկարահանում և լուսաբանում,

• եթերով հեռարձակված նյութերի արխիվացում՝ ըստ ամիսների։

Հարկ է նշել, որ նմանատիպ տենդերներ Մառնեուլիի քաղաքապետարանը գրեթե ամեն տարի հայտարարում է։ Նախորդ տարիներին մրցույթներում, որպես կանոն, առանց մրցակցության հաղթող է ճանաչվել Marneuli TV-ն (ներկայիս «RegionNews»-ը)։

Ավանդաբար նման տենդերները հայտարարվում էին հունվար ամսին, սակայն այս տարի գործընթացի մինչև մայիս հետաձգման պատճառը այս պահին անհայտ է։

"Ռադիո Մառնեուլին"  կփորձի այս հարցի վերաբերյալ պատասխան ստանալ Մառնեուլիի քաղաքապետարանից։