ქერჩის სრუტეში უკრაინულ გემებს რუსეთმა ცეცხლი გაუხსნა
12:15 / 26.11.2018
უკრაინის სამხედრო საზღვაო ძალების გემებს,
ქერჩის სრუტის დატოვებისას რუსეთის სასაზღვრო ძალების გემმა ცეცხლი
გაუხსნა.
ამის შესახებ ინფორმაცია უკრაინულმა მხარემ გაავრცელა.
არსებული ინფორმაციით, ორი მცირე ზომის
საარტილერიო გემი “ბერდიანსკი” და “ნიკოპოლი” ოდესის პორტიდან
მარიუპოლში გეგმიურ გადასვლას ახორციელებდნენ. გარდა ამისა,
ძალადობრივად იყო შეჩერებული ბუქსირი “იანი კაპუ”. უკრაინული მხარე
ასევე იუწყება, რომ აღნიშნული გემები რუსული მხარის მიერ არის
დაკავებული. ინციდენტის შედეგად, რამდენიმე უკრაინელი მეზღვაური
დაშავდა.
ოფიციალური კიევის ინფორმაციით, რუსეთის
მხრიდან აგრესიული ქმედებები პირველად 25 ნოემბრის დილას
განხორციელდა, როცა სამი უკრაინული გემი ოდესიდან მარიუპოლისკენ
მიემართებოდა. თავდაცვის უწყების ცნობით, რუსული გემი უკრაინულ
ბუქსირს განგებ შეეჯახა. უკრაინული მხარის ინფორმაციით, გემების
გადაადგილება წინასწარ იყო დაგეგმილი.
წყარო: ინტერპრესნიუსი
