რუსეთი, თუნდაც დიპლომატიური ურთიერთობების არარსებობის შემთხვევაში, აპირებს გააგრძელოს საქართველოსთან ურთიერთობების ნორმალიზაციის ხელშეწყობა, განაცხადა რუსეთის საგარეო საქმეთა მინისტრის მოადგილემ მიხაილ გალუზინმა ТАСС-თან ინტერვიუში.

„რაც შეეხება თბილისთან დიპლომატიურ ურთიერთობებს, როგორც ცნობილია ის 2008 წელს გაწყდა [მიხეილ] სააკაშვილის რეჟიმის ინიციატივით. სამწუხაროდ, მათი აღდგენის შესაძლებლობა ექვემდებარება პოლიტიკურ მოთხოვნებს, რომლებიც ეწინააღმდეგება რეგიონის ახალ რეალობას. ჩვენი მხრივ, დიპლომატიური ურთიერთობების ნაკლებობის მიუხედავად, ჩვენ ვაპირებთ გავაგრძელოთ საქართველოსთან ურთიერთობების ნორმალიზაციის ხელშეწყობა“, - განაცხადა მან.

გალუზინმა რუსეთსა და საქართველოს შორის სავაჭრო-ეკონომიკური ურთიერთქმედების პოზიტიურ დინამიკაზე გამახვილა ყურადღება.

„საქართველოს ხელისუფლების პრაგმატული ხაზის წყალობით, ჩვენს ქვეყნებს შორის ურთიერთობებში რთული პერიოდი, რომელიც გამოწვეული იყო 2019 წელს ქართველი რადიკალების ცნობილი პროვოკაციით, დაძლეულია. გასულ წელს გაუქმდა საქართველოს მოქალაქეების რუსეთში მოკლევადიანი მოგზაურობის სავიზო რეჟიმი, რომელიც 2000 წლიდან მოქმედებდა და აღდგა პირდაპირი ფრენები“, - განაცხადა მან.

რუსი დიპლომატის თქმით, ეს ნაბიჯები დადებითად მიიღო მთავრობამ და საქართველოს მოსახლეობის აბსოლუტურმა უმრავლესობამ.

"რუსეთის პრეზიდენტის 2023 წლის 10 მაისის შესაბამისი ბრძანებულებების შესრულებამ ხელი შეუწყო ჩვენს ხალხებს შორის კომუნიკაციის პირობებს, ხელი შეუწყო ბიზნესწრეებს შორის კონტაქტების გაძლიერებას და სავაჭრო-ეკონომიკური კავშირების განვითარებას. გასულ წელს საქართველოს 1.4 მილიონზე მეტი სტუმარი ეწვია რუსეთიდან. რუსეთის მოქალაქეები უზრუნველყოფენ საქართველოს ეკონომიკის ტურისტული სექტორის შემოსავლის მეოთხედს. რუსეთის სავაჭრო-სამრეწველო პალატაში შეიქმნა რუსულ-ქართული ბიზნესსაბჭო და მის ფარგლებში უკვე გაიმართა ხუთი შეხვედრა“, - აღნიშნა გალუზინმა.

მისი სიტყვებით, იზრდება პირდაპირი ავიარეისების სიხშირე და გეოგრაფია, ორი რუსული და ერთი ქართული ავიაკომპანია რუსეთსა და საქართველოს ქალაქებს შორის კვირაში ჯამში 60-ზე მეტ რეისს ახორციელებს.

მანამდე რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა, რომ საქართველოს ხელმძღვანელობა გასულ წელს „რუსეთის მიმართ პრაგმატულ ხაზს“ ატარებდა.