Rusiyanın “Vaqner” özəl hərbi şirkəti tərəfindən Ukraynada əsgər
kimi işə götürülən, qətldə təqsirli bilinən Konstantin Kisilyov
“Şücaət ordeni” və komandir vəzifəsi alıb.
Bu barədə “Vajnıye istori” müstəqil nəşri yazır. Onun mənbəyi
Rusiya Mari-El Respublikasının altıncı koloniyasına bağlı şəxsdir.
Kisiliov 2017-ci ildən iki qadını qətlə yetirdiyinə görə bu
koloniyada 9 il cəza çəkirdi.
O, 2022-ci ilin
sentyabrında hərbi şirkətin qurucusu Yevgeni
Priqojin məhbusları işə götürmək üçün koloniyada olduqdan sonra
"Vaqner"ə qoşulub.
Nəşrin mənbəsinin məlumatına görə, Kisilyovun arvadı ərinin keçmiş
kamera yoldaşlarına deyib ki, o, artilleriya hücumu zamanı bölmədən
sağ qalan yeganə şəxs olduğu üçün mükafat və komandirlik alıb.
Həyat yoldaşının sözlərinə görə, ordeni Kisilyova şəxsən Priqojin
təhvil verib. Qadın ərinin keçmiş kamera yoldaşlarına videonu da
göndərib ki, orada Kisilyov 15 kişi arasından yeganə sağ qaldığını,
komandir olduğunu və Krasnodarda hansı pula yeni mənzil alacaqları
barədə göstəriş verdiyini söyləyir.
“Vaqner” özəl hərbi şirkəti Ukraynaya qarşı müharibədə nizami rus
qoşunları ilə birlikdə iştirak edir. Bu illər ərzində bir sıra
KİV-lər, o cümlədən jurnalist araşdırmalarına əsaslananlar
yazırdılar ki, “Vaqner”in sahibi prezident Putinə yaxın olan və
onun “şəxsi aşpazı” adlandırılan biznesmen Yevgeni Priqojindir.
Priqojin özü sentyabrın 26-da açıq şəkildə etiraf etdi ki, o,
"Vaqner"in yaradıcısı və maliyyəçisidir. Priqojin Ukraynada
müharibə məhkumlarının işə cəlb olunmasında fəal iştirak
edirdi.