Bu ilin yanvar-iyun ayları ərzində Rusiya büdcəsinin neft və qaz
gəlirləri azalaraq 3.38 trilyon rubla (34 milyard dollar)
düşüb.
2023-cü ilin birinci yarısında büdcənin ümumi gəliri 12.38 trilyon
rubl olub.
Bu ötən ilin müvafiq dövrü ilə müqayisədə 12 faiz azdır. Büdcə
xərcləri isə ötən illə müqayisədə 19 faiz artaraq 14.9 trilyon rubl
olub.
Beləliklə birinci
yarım ildə büdcə kəsiri 2.59 trilyon rubla çatıb.
Son bir ay ərzində bu xərclər 816 milyard rubl azalıb. Bunun 500
milyard rublu Milli Rifah Fondundan çıxarılıb.
Rusiya Maliyyə Nazirliyi bildirir ki, neft-qaz gəlirlərinin
azalması Rusiyanın Ural markasından olan neftinin ucuzlaşması və
qaz ixracının azalması ilə bağlıdır.
Rusiya İqtisadiyyat Nazirliyi bundan əvvəl neft-qaz ixracının
2023-cü ildə 6.7 faiz azalacağını proqnozlaşdırmışdı.
Bu proqnoza görə sonrakı üç ildə ixrac, o da “dost ölkələrə”
səmtləndirmə hesabına 2.9 faiz artmalıdır.
Avropa İttifaqı Rusiyanın Ukraynaya səbəbsiz və əsassız hücumuna
görə 2022-ci ilin dekabrından Rusiya neftinə qiymət tavanı müəyyən
edib.
Bundan iki həftə sonra Rusiya qazına da qiymət tavanı qoyulub.
Bu qaydaya görə Rusiya nefti bir barrel üçün 60 dollardan baha
satıla bilməz.
Qiymət tavanının müəyyən edilməsinin və dənizlə daşınan Rusiya
neftinə qadağanın ilk həftəsində Rusiyanın ixracı 54 faiz
azalmışdı.
Bundan başqa Rusiya Yamal-Avropa və Şimal Axını 1 layihələrinin
dayandırılması ilə bağlı boru qazı bazarının əhəmiyyətli
hissəsindən məhrum olub.
Rusiya prezidenti Vladimir Putin bunlarla bağlı demişdi ki, Rusiya
onun neftinə qiymət tavanı tətbiq edən ölkələrə neft
satmayacaq.