FOTO/VİDEO - Marneulidə “Bu yolun son stansiyası” adlı tamaşa nümayiş olundu
00:53 / 11.03.2019
10
mart tarixində Marneuli Mədəniyyət evində “Bu yolun son stansiyası”
adlı tamaşa nümayiş olundu.Tamaşa Marneuli izləyiciləri tərəfindən
maraqla və böyük coşqu ilə qarşılandı.
Baş tutan tamaşada TİKA təkilatının nümayəndələri, Yeşilay
cəmiyyətinin nümayəndələri, gənclər, QHT-lər, siyasətçilər, media
nümayəndələri və maraqlanan şəxslər iştirak etdilər.
Tamaşa Azərbaycan dilində oldu və giriş sərbəst idi. Tamaşanın
sonunda "Yeşilay" cəmiyyəti tərəfindən aktyorlar və ssenari
müəllifi Anar Rafiqoğlu mükafatla təltif olundu.
Onu da əlavə edək ki, “Bu yolun son stansiyası” adlı tamaşa TİKA
tərəfindən maliyyələşir. Layihəyə əsasən tamaşa 5 dəfə səhnəyə
qoyulmalıdır. Artıq tamaşa üç dəfə nümayiş olunub. İlk təqdimatı 24
yanvar tarixində Tbilisi şəhərində, daha sonra isə 10 fevralda
Batumidə gürcü dilində tamaşaçılara təqdim olunmuşdu. 6 martda isə
Qardabani rayonunda Azərbaycan dilində tamaşaçıların ixtiyarına
verilmişdi.
Anar Rafiqoğlu onu da bildirdi ki, “Bu yolun son stansiyası” adlı
tamaşa Marneulidən sonra Bolnisidə təqdim olunacaq. Amma Bolnisidə
nə zaman səhnələşdirləcəyinin dəqiq vaxtının təyin olunmadığını
bildirdi.
Anar onu da qeyd etdi ki, “Bu yolun son stansiyası” adlı tamaşa
gələcəkdə Gürcüstanın ayrı-ayrı bölgələrində və ölkə hüdudlarından
kənarda da tamaşaçılara təqdim olunması plalaşdırılır.
Xatırladaq ki, “Bu yolun son stansiyası” adlı tamaşa “Yeşilay”
Cəmiyyətinin “Gürcüstanda ictimaiyyətin zərərli vərdişlərlə bağlı
maarifləndirilməsi, sənət vasitəsi ilə təbliği” layihəsi
çərçivəsində hazırlanıb.
“Bu yolun son stansiyası” tamaşasının əsas mövzusu insanların
zərərli vərdişləri və narkomaniya haqqındadır.
Tamaşa narkotik vasitələrin insanlara olan zərərlərindən və insan
həyatını məhv etməsindən bəhs edir. Tamaşada həmçinin insanların
sosial şəbəkələrdən, texnologiyalardan asılılığı və texnologiyalar
sayəsində həyatın süniləşməsi mövzusuna da toxunulur.