Tbilisidə mənzilə hücum edənlər qadına isti ütü ilə işgəncə veriblər
Tbilisidə mənzilə basqın edənlərin qadına isti
ütü ilə işgəncə verdikləri, daha sonra küt əşya ilə döydükləri
bildirilir.
Bu
haqda məlumatı “Mtavari Arxi” qonşulara istinadən verir.
Qonşular telekanala bildiriblər ki, hadisə 30 sentyabrda baş verib.
Onlar güman edirlər ki, hücum edənlər qadının evdə nə zaman tək
olduğunu bilirlərmiş. Hadisədən sonra isə evdən külli miqdarda pul
və qızıl aparıblar.
Qonşular onu da qeyd edirlər ki, hücuma qədər qadını övladlarını
öldürməklə hədələyirmişlər.
Qadın Aladaşvili klinikasına yerləşdirilib. Həkimlərin sözlərinə
görə, o, beyin sarsıntısı alıb, bədən və döş nahiyəsində səthi
zədələr var.
DİN-dən “Netgazeti”yə verilən məlumata görə, faktla bağlı Cinayət
Məcəlləsinin 179-cu maddəsinin ikinci və üçüncü hissəsinin “b”
bəndləri ilə istintaq aparılır. Həmin maddə mütəşəkkil olaraq,
qanunsuz şəkildə mənzilə soxulmaqla soyğunçuluq törətməyi nəzərdə
tutur.