“Avropalı Gürcüstan” partiyasının prezidentliyə namizədi Davit
Bakradze “Ata Holdinq” parkı ərazisində Marneuli gəncləri ilə görüş
keçirir.
Çıxışı zamanı o, görüş iştirakçılarına prezident olması halında
prezident fondundan etnik azlıqların xaricdə təhsil alması üçün
kvota ayıracağını vəd etdi.
Həmçinin prezident administrasiyasında da kvota sistemi yaradılacaq
ki, etnik azlıq nümayəndələri də orada işləyə və ya təcrübə keçə
bilsinlər.
“Əsas odur ki, qeyri-gürcüdilli gənclərin bu vəsait ilə
maliyyələşməsinə zəmanət olsun. Necə, nə qədər, hansı miqdarda -
buna məhz gənclərlə qərar vermək istəyirik və bu günkü görüş də
bunun üçün idi” – deyə Davit Bakradze.
Davit Bakradze görüşdə onu da əlavə etdi ki, əgər təhsil naziri
olsaydı və universitetə yerləşdirmək üçün bir Tbilisili və bir
Marneulili gənc arasında seçim etmək məcburiyyətində qalsaydı, o,
Marneulili gənci seçərdi.
“Marneuli” radiosunun jurnalistinin onun bəyanatının müsbət mənada
diskriminasiya olub olmaması ilə bağlı sualına cavab olaraq
Bakradze bildirdi ki, o, Tbilisili gənclərə qarşı deyil, lakin
dövlət maraqları üçün milli azlıqların gücləndirilməsi daha çox
əhəmiyyət daşıyır.
“Əgər bu müsbət mənada diskriminasiyadırsa, hesab
edirəm ki, belə diskriminasiya vacibdir. Misal üçün yalnız dil
problemi olmayan və ya ödəniş etmək üçün daha az maddi problemi
olanların deyil, hər kəsin gələcək üçün perspektivinin olması
Gürcüstan üçün çox mühümdür” - deyə Davit
Bakradze.
Prezidentliyə namizəd bu bəyanatı gənclərin universitetə daxil ola
bilməməsi ilə bağlı suala cavab verərkən verdi.
Kvemo Kartli bölgəsində yaşayan vahid milli imtahanlarda keçid
balını toplamalarına baxmayaraq universitetlərə daxil ola bilməyən
abituriyentlər narazılıqlarını bildirmişdilər və “Avropalı
Gürcüstan” partiyasının Marneuli ofisinə müraciət etmişdilər.
Partiyanın üzvü Əhməd İmamquliyev bizimlə söhbəti zamanı
bildirmişdi ki, Kvemo Kartli miqyasında belə tələbələrin sayı 482
nəfərdir.