Tbilisi Şəhər Məhkəməsi “Vahid
Milli Hərəkat”ın üzvü Davit Kirkitadzeni vəzifə səlahiyyətlərindən
sui-istifadə etmək ittihamı ilə bağlı iş üzrə günahsız hesab
edib.
Bu barədə “Netgazeti”yə Tbilisi Şəhər Məhkəməsindən bildiriblər.
Qeyd olunan işlə bağlı Davit Kirkitadzeyə 10 000 lari dəyərində
qoyulmuş girov da ləğv olunub.
İstintaq Xidməti Kvemo Kartli bölgəsinin keçmiş qubernatoru Davit
Kirkitadzenin vəzifə səlahiyyətlərindən sui-istifadə etməsi
ittihamı ilə 23 fevral 2015-ci il tarixində məsuliyyətə cəlb
etmişdi. İstintaq Davit Kirkitadzeni 2011-2012-ci illərdə onun
göstərişi ilə Kvemo Kartli bələdiyyəsinə məxsus xüsusi texnikanın
Gürcüstan qanunlarını pozmaqla Davit Kirkitadzenin qardaşı İrakli
Kirkitadze və keçmiş dövlət məmuru Qiorqi Udesianinin birgə
şirkətləri “Avtohaus-Rustavi2011” MMC və “Titan 2011” MMC
tərəfindən Tbilisi-Rustavi şosesi kənarında maşın bazarının
tikintisində istifadə etməkdə, bununla da dövlətə 248 400 lari
maddi zərər vurmaqda təqsirləndirirdi. Davit Kirkitadzeyə qarşı
ittiham qiyabi olaraq irəli sürülmüşdü, ancaq məhkəmə ona 10 000
lari dəyərində girov tətbiq etmişdi.
Davit Kirkitadzeyə qarşı Cinayət Məcəlləsinin başqa bir maddəsi ilə
də istintaq davam edir. Ona qarşı 19 dekabr tarixində Kaxeti Polis
Departamentində ittiham irəli sürülüb. İstintaq Kirkitadzeni
Cinayət Məcəlləsinin 353-cü maddəsi ilə nəzərdə tutulmuş cinayəti
törətməkdə – 16 dekabr tarixində Velistsixedə keçirilmiş aksiyada
polisə hücum, fiziki zorakılıq və əmlaka zərər vurmaqda ittiham
edir.