Gürcüstanda fəaliyyət göstərən Ümum Gürcüstan
Müsəlmanları Ali Dini İdarəsi Ukrayna Pravoslav Kilsəsini
müstəqilik qazanması münasibəti ilə təbrik edib.
Təbrik bəyanatında deyilir:
"Uca Allahın adı ilə
Hamıya məlum olduğu kimi, 05.01.2019 tarixində Ümumdünya və
Konstantinopol (Fənər-Rum) patriarxı Vartolomey tərəfindən Ukrayna
Pravoslav Kilsəsinin müstəqilliyi tanınaraq, ona Avtokefal statusu
verildi.
Beləliklə Ukrayna Pravoslav kilsəsi Avtokefal Pravoslav kilsələrin
dünyada 15-cisi oldu.
Biz, dünya Avtokefal Pravoslav kilsələri ilə müqayisədə son
minillikdə əldə etdiyi ən böyük müstəqillik münasibəti ilə, Ukrayna
Pravoslav kilsəsini, Ukraynalı inanclıları və bütün
azadlıqsevərləri səmimi qəlbdən təbrik edir və uca Allahdan bu
müstəqilliyin daimi olmasını diləyirik!
Hörmətlə: Ümum Gürcüstan Müsəlmanları Ali Dini idarəsinin Sədri və
Şeyxi Seyid Mirtağı Əsədov" - yazır.
Qeyd edək ki, 5 yanvar tarixində Dünya Ortodoks Patriarxı
Varfolomey Ukrayna Yerli Avtokefal Pravoslav Kilsəsinin yaradılması
ilə bağlı kilsə fərmanını imzalayıb. Mərasim İstanbuldakı Müqəddəs
Georgi məbədində keçirilib.
Bunadək isə 4 yanvar tarixində Konstantinopol Patriarxı dünya
ortodoks kilsələrinin liderlərini Ukrayna Kilsəsinin müstəqilliyini
dəstəkləməyə çağırmışdı.
Bu məsələ ilə bağlı Gürcüstan Pravoslav Kilsəsinin Müqəddəs
Sinodunun vahid mövqeyi hələ ki məlum deyil. Sinodun keçən il
dekabrın 27-də yayımlanmış qərarına görə, məsələnin müzakirəsinə
növbəti iclasda davam ediləcək.
Kilsə kimi Gürcüstan hakimiyyətinin Ukrayna Kilsəsinin müstəqilliyi
ilə bağlı nə düşündüyü də məlum deyil. Baş nazir Mamuka Baxtadze
mövzu ilə bağlı verilmiş suala cavab verməyib. Gürcüstan prezidenti
isə məsələni həssas adlandırıb və bildirib ki, o, prezident kimi
Ukraynanı təbrik etməyəcək.
Ukrayna Kilsəsinin müstəqilliyini Gürcüstandan ilk olaraq Gürcüstan
Evangelist-Baptist Kilsəsinin mitropoliti Malxaz Sonqulaşvili
təbrik edib.
Xatırladaq ki, Prezident Pyotr Poroşenko ölkədə Ukrayna Yerli
Avtokefal Pravoslav Kilsəsinin yaradıldığını elan edib.
Prezident həmçinin Ukrayna Pravoslav Kilsəsinin Kiyev
patriarxatının mitropoliti Yepifaniya Dumenkonun yeni kilsəyə
primat təyin olunduğunu bildirib.