Bələdiyyə Məclisinin deputatları hər ay dövlət büdcəsindən 600 lari nə üçün alırlar və nənyə xərcləyirlər
Marneuli
Bələdiyyə Məclisinin bütün sıravi üzvləri öz vəzifələrini yerinə
yetirmək üçün büdcədən 600 lari alırlar.
Həmin məbləği deputatlar əsasən yanacaq,
sakinlərlə görüşlərin təşkili və öz vəzifələrini yerinə yetirmək
üçün xərcləməlidirlər.
Marneuli Bələdiyyə Məclisinin İnzibati Xidmətinin rəhbəri Nino
Beridze bizimlə söhbəti zamanı bildirdi ki, həmin məbləği bütün
deputatlar alırlar, lakin onlar dövlət vəsaitini nəyə və nə üçün
xərclədikləri ilə bağlı heç bir hesabat təqdim etmirlər.
“Yalnız deputat səlahiyyətlərinin yerinə yetirilməsi
ilə bağlı xərclər var. Bura nəqliyyat, sənədlərin fotosurətinin
çıxarılması, görüşlərin təşkil olunması və ümumiyyətlə hər şey
daxildir.” – Nino Beridze deyir.
Marneuli Bələdiyyə Məclisinin sədri Amiran Qiorqadze bizimlə
söhbəti zamanı qeyd etdi ki, deputatlar tərəfindən vəsaitin
xərclənməsinə nəzarət olunması problemli məsələdir.
“Ay ərzində bir neçə dəfə iclaslara gəlməli olurlar və
s. Buradan da orta hesabla məbləğ müəyyənləşdirilib və xərclərin
qarşılanması üçün verilir, bu maaş deyil.” – Amiran
Qiorqadze deyir.
Nümunə üçün, deputatlardan biri – Mirkazım Yaqubov deyir ki, o,
2018-ci il ərzində müxtəlif infrastruktur layihələr və sakinlərin
ümumi problemləri ilə əlaqədar olaraq, Aşağı Saral , Yuxarı Saral,
Şulaveri, Araflı, İmir və daha bir neçə kənddə əhali ilə görüşüb və
onun üçün ayrılmış 600 larini də məhz bu görüşlərin təşkili üçün
xərcləyib.
Təəssüf ki, Yaqubovun dediklərini təsdiqləyəcək heç bir sənədi
yoxdur, çünki qanunvericilik və normativ aktlarla səlahiyyətlərin
yerinə yetirilməsi üçün ayrılmış məbləğin qeydiyyatı üçün
deputatlara heç bir öhdəlik müəyyən olunmayıb. Məhz buna görə də,
deputatların büdcədən ayrılmış vəsaiti nəyə xərclədikləri
qeyri-müəyyən olaraq qalmaqdadır.