Marneuli meriyası Tamarisi kəndində cüdo
zalının tikilməsi üçün 870 260 lari dəyərində tender elan
edib.
Tenderin şərtlərinə görə qalib gəlmiş şirkət
müqavilə imzalandıqdan 210 gün ərzində işləri tamamlamalıdır.
Marneuli bələdiyyəsinin idman məktəbinin direktoru İaqo Naveriani
bizimlə söhbəti zamanı bildirdi ki, Tamarisi kəndində idman zalının
tikilməsinə həqiqətən ehtiyac var.
“Yalnız Tamarisi kəndi deyil, ümumiyyətlə bütün
kəndlərdə cüdo və digər idman obyektlərinin tikilməsi idmanın
inkişafı üçün çox yaxşı olardı və bütün kəndlərdə belə zallar
olmalıdır”, – İaqo Naveriani bildirdi.
Naveriani həmçinin qeyd edir ki, Tamarisidə zalın tikintisi kənddə
idmançıların sayının əhəmiyyətli dərəcədə artmasına səbəb
olacaq.
Qeyd edək ki, Marneuli bələdiyyəsinin 2019-cu il büdcəsində idmanın
inkişafına dəstək üçün 1 441 800 lari nəzərdə tutulub. Marneuli
meriyasının Maliyyə-Büdcə Xidmətinin rəhbəri Vüqar Məmmədov bizimlə
söhbəti zamanı bildirdi ki, qeyd olunan məbləğ Tamarisidə idman
zalı, Saimerloda mini stadion və s. bu kimi infrastruktur layihələr
üçün nəzərdə tutulub. Marneuli idman məktəbi üçün isə 1 180 000
lari ayrılıb.