2-ci Kosalı kəndində 67 yaşlı kişi itkin düşüb
2-ci
Kosalı kəndində 26 fevral tarixində 67 yaşlı kişi itkin düşüb. Onu
sonuncu dəfə həmkəndlisi olan çoban çay kənarına doğru maşını ilə
sürətlə hərəkət edərkən görüb.
Çoban 67 yaşlı kişinin evinə gələrək ailə
üzvlərinə onun əsəbi şəkildə sürətlə çay kənarına doğru hərəkət
etdiyini deyib. Balıq tutmaq həvəskarı olan kişinin ailə üzvləri
onun balıq tutmaq məqsədi ilə çay kənarına getdiyini
düşünüblər.
Lakin saatlar keçməsinə baxmayaraq o, evinə qayıtmayıb. Etibarlı
mənbədən aldığımız məlumata əsasən, kişinin həyat yoldaşı 6 ildir
ki, dünyasını dəyişib və o, ailə üzvlərinə evlənmək istədiyini
deyib. Ailə üzvləri isə onun bu istəyini normal qarşılamayıblar və
beləliklə ailədə münaqişə yaranıb.
Daha sonra o, evdən çıxıb və əsəbi şəkildə çay kənarına gedib.
Həmin gün içkili olduğundan onun intihar edərək özünü çaya atdığı
güman edilir.
Daxili İşlər Nazirliyindən “Marneuli” radiosuna verilən məlumata
görə, hadisə ilə bağlı Cinayət Məcəlləsinin qeyri-qanuni olaraq
azadlıqdan məhrumetməni nəzərdə tutan 143-cü maddəsi ilə istintaq
davam edir.