Temur Abazovun dediyinə görə, uşaq bağçalarında uşaqlar ac qalırlarmış
Marneuli Uşaq Bağçaları Birliyi uşaq
bağçalarında uşaqların ac qalması ilə bağlı Temur Abazov tərəfindən
yayılmış məlumatı təkzib edir.
Temur Abazov bu məlumatı TV4 kanalında qonaq
olarkən vermişdi. O, bildirmişdi ki, Marneuli uşaq bağçalarında
yeməklərin oğurlanması halları baş verirdi.
“Təsəvvür edin ki, bağça əməkdaşları əti, çörəyi, yumurtanı
oğurlayırdılar və uşaqlar ac qalırdılar. Cinayət işi də
qaldırılmışdı. Problem qeyri-düzgün idarə olunmaqda idi. Bir hadisə
baş verdikdə, həmin əməkdaş işdən uzaqlaşdırılmırdı, davam edirdi,
lakin bu belə davam etmədi və belə işçilər işdən çıxarıldı. Uşaqlar
öz normalarını almırdılar, çox olduğunu düşünüb geri göndərirdilər.
Uşaqlar evə gedirdilər, demirdilər ki, acam, yemək ver və
valideynlər bağçaya yeməklə gəlirdilər, uşaqlar o dərəcədə ac
qalırdılar”, – deyə Abazov bildirmişdi.
Uşaq bağçalarının rəhbərləri bu məlumatı qəti şəkildə təkzib
edirlər.
“Belə heç nə olmayıb, çünki monitorinq həmişə var, buna
sadəcə yol verə bilmərik. Gündəlik qəbul, istifadə yoxlanılırdı,
necə verməyə bilərdik? Bu mümkün deyil. Sadəcə menyu dəyişmişdi.
Daha yaxşı olmuşdu”, – deyə 3 saylı bağçanın rəhbəri
Ketevan Minadze deyir.
Saimerlo uşaq bağçasının rəhbəri Aza Xarşiladze də bu məlumatı
təkzib edir.
“Nə danışırsınız? Nə vaxt olub, neçənci ildə olub?
Tamamilə yalandır”, – Xarşiladze deyir.
“Marneuli” radiosu Uşaq Bağçaları Birliyinin rəhbəri Zaur Kərəmovla
əlaqə saxladı. O, hazırda Gürcüstanda olmadığından müsahibə yaza
bilməsək də, “facebook” vasitəsilə yazaraq bildirdi ki, Abazovun
bəyanatı barədə məlumatı ilk olaraq bizdən eşidib. Kərəmov bildirdi
ki, nə əvvəllər, nə də indi uşaqların qida problemi olmayıb.
Məsələ ilə bağlı Marneuli merinin səlahiyyətlərinin icraçısı Zaur
Tabatadze ilə əlaqə saxladıq. O, bildirdi ki, belə halların baş
verməsi haqqında heç bir məlumatı yoxdur.
“Bizim birgə işlədiyimiz müddətdə belə hal eşitməmişəm,
əgər belə hal olmuşdusa müvafiq tədbir görməli idi”,
– Tabatadze bildirdi.
Marneuli uşaq bağçalarındakı vəziyyətlə bağlı Temur Abazov 7 mart
tarixində Kvemo Kartli televiziyasının “Açıq efir” verilişində
söhbət açmışdı.