14 may tarixində “Marneuli” radiosunda efirə
gedən “Aktual mövzu” verilişinin qonağı Marneuli meri vəzifəsinə
müstəqil namizəd Əli Bədirov oldu.
Bədirov verilişdə öz proqramından danışdı və
bildirdi ki, Marneuli, eləcə də digər rayonlarda mer mütləq
müstəqil namizəd olmalıdır.
“Partiyanı təmsil edən istənilən mer və ya icra başçısı
özünün yaxşı ideyaları olsa belə, partiyanın digər üzvlərinin
razılığı olmadan həyata keçirə bilməz. Orada işlər əsasən komanda
şəklində olur və dövlət məmuru olduqlarını unudurlar. Onlar
başlayırlar partiyanın digər liderlərinin dediklərini etməyə,
deyirlər bunu et – edir, deyirlər etmə – etmir”, –
Əli Bədirov bildirdi.
Verilişdə söhbət zamanı Bədirov bildirdi ki, onun seçkiöncəsi
kampaniyasının xərclərini özü və ailəsi qarşılayır, çünki istəyir
ki, seçkilərdə sona qədər müstəqil olsun.
Bədirov hesab edir ki, onun seçkidə qalib gəlmək şansı çoxdur,
lakin bildirir ki, ikinci tura keçmək ehtimalı daha yüksəkdir və
ikinci turda rəqibi “Gürcü Arzusu”nun “milli hərəkatçı” namizədi
Zaur Darğallı və ya “Güc Birlikdədir”in namizədi Aqil Mustafayev
olacaq.