Marneuli meriyası dayanacaqların yaxınlığında yerləşən köşkləri ləğv edəcək
Marneulidə dayanacaqların ətrafındakı kiçik,
fəaliyyətsiz köşkləri yəqin ki, hamınız görmüsünüz.
Onlardan bəziləri zibilxanaya çevrilib,
bəziləri isə demək olar ki, əhali üçün təhlükəyə çevrilib. Söhbət 5
saylı ictimai məktəbinin qarşısında yerləşən köşkdən gedir. Köşkün
şüşələri tamamilə sınıb və yerə səpələnib.
Daha bir köşk isə Rustaveli küçəsində yerləşən işıqforun yanında
yerləşir və əhali tərəfindən zibilxanaya çevrilib.
Bundan əlavə köşklərə müxtəlif məlumat broşürləri və seçki qabağı
dövrdən qalan namizədlərin plakatları vurulub.
Köşklərin yararsız olduğunu meriyadan da təsdiq edirlər və deyirlər
ki, onların hamısı yaxın gələcəkdə götürüləcək.
“Fəal şəkildə çalışırıq ki, şəhərdə müasir tipli
dayanacaqlar qurulsun. İlkin mərhələdə 20-yə yaxın dayanacaqdan
söhbət gedir. Bu ərazilər artıq seçilib, hər biri təqribən 10
kvadratmetrdir. Artıq sona yaxınlaşmışıq və yaxın dövrdə bu proses
başlayacaq. Mən bilərək tarixi qeyd etmirəm, ancaq tezliklə
başlayacaq. Köhnə və sıradan çıxmış dayanacaqlar yenisi ilə əvəz
olunacaq. Bunun üçün bələdiyyə məbləğ xərcləməyəcək. Əksinə, torpaq
icarəsindən məbləğ əldə edəcək”, – merin müavini Laşa
Lobcanidze deyir.
İlk əvvəl bu köşklərin tikilməsinə niyə ehtiyac yaranıb sualına
Lobcanidze də cavab verə bilmir və deyir ki, yeni dayanacaqlar
köşksüz olacaq.
“Biz bu köşkləri ləğv edəcəyik. Yalnız dayanacaq olacaq
ki, sərnişinlər üçün rahat şəkildə sığınacaq olsun və nəqliyyatı
gözləsinlər. Yalnız bu funksiya olacaq və burada heç bir köşk
olmayacaq”, – Laşa Lobcanidze deyir.
Marneuli miqyasında beşə qədər fəaliyyətsiz köşk var.