Hökm: Faktlarla manipulyasiya
Xülasə
Belə məlumat yayılıb ki, əgər bir insana vərəm vaksini (БЦЖ)
vurulubsa, koronavirus ona təsir etmir. Əslində, elmi ictimaiyyətdə
vərəm vaksininin koronavirusun (COVID-19) nisbətən asan
keçirilməsində və koronavirusa bağlı ölüm hallarının azaldılmasında
müsbət rol oynaya biləcəyinə dair bir fərziyyə mövcuddur. Bu
mövzuda araşdırmalar davam edir və əvvəlcədən verilən fərziyyəni
qeyd şərtsiz təsdiq etmək düzgün deyil.
Təhlil
“Geonewest.com” internet mediyası "Qolunda “oxşar" çapıq olanlar,
təbrik edirəm, yeni bir araşdırmaya görə, koronavirus sizə heç nə
edə bilməz – yəni vərəm vaksini olan insanlar koronavirusa qarşı ən
davamlıdırlar” başlığı ilə bir xəbər yayımlamışdı. Qeyd edək ki,
məqaləni “itar.ge” 28 mart tarixində, “geonewest.com” isə 29 mart
tarixində yayımlamışdı. Bununla birlikdə, “geonewest.com”-un
məqaləsi 24 sentyabrda “Facebook”-da yenidən paylaşıldı. Bu məsələ
ilə bağlı “Fakt-Metr” daha əvvəl də yazmışdı.
“Geonewest.com” “NeuroScience News” və “France24” tərəfindən
yayımlanan məlumatlara istinad edərək yazır: "Nəşrin məlumatına
görə, bu gün də uşaqlarda geniş istifadə olunan “Be-Tse-Je” (БЦЖ)
adlı peyvənd koronavirus peyvəndi icad olunanadək xəstəliyin
qarşısını almaq üçün uğurla istifadə edilə bilər."
Qeyd etmək lazımdır ki, “NeuroScience News” və “France24”, eləcə də
digər aparıcı KİV-lər peyvənd haqqında həqiqətən məlumat
yaymışdılar, lakin “geonewest.com” saytının yayımladığı məqalədə
bir sıra səhvlər var. Hər şeydən əvvəl, başlıqda peyvəndin
koronavirusla mübarizədə mümkün istifadəsi manipulyasiya ilə təqdim
edilir və oxucunu vərəm vaksini olunacağı təqdirdə, koronavirusun
artıq bir təhlükə olmadığına inandırır.
Müxtəlif araşdırmalara görə, vərəmin qarşısının alınması üçün
hazırlanmış vərəm vaksini insanın immunitetini artırır. Pandemiya
başlandıqdan qısa müddət sonra elmi dairələr vərəm vaksininin
koronavirusa qarşı təsirlərini müzakirə etməyə başladılar.
2020-ci ilin yazında Melburndakı Murdok Uşaq Tədqiqat İnstitutu
vərəm vaksininin effektivliyini öyrənməyə başladı. Tədqiqata
yoluxucu xəstəliklər üzrə tədqiqat rəhbəri Naycel Kurtis rəhbərlik
edir. Professor Kurtisin sözlərinə görə, vərəm vaksini immunitet
sistemini gücləndirə bilər ki, bu da ümumiyyətlə bədənin bir çox
virus və bakteriya növündən daha yaxşı qorunmasına imkan verir.
Tədqiqatlarda 4 min könüllü tibb işçisi iştirak edəcək. Tədqiqat
altı ay davam edəcək və ilkin nəticələr üç aydan sonra məlum
olacaq. Tədqiqatlar Almaniya, İngiltərə və Hollandiyada da
aparılır. Hollandiyada səkkiz xəstəxanadan 1000 tibb işçisi
araşdırmaya cəlb ediləcək. Xəstəliklərə Nəzarət Milli Mərkəzinin
direktor müavini Paata İmnadzenin sözlərinə görə, hələ də elmi
cəhətdən sübut olunmasa da, qızılca/məxmərək/parotit peyvəndi,
xüsusən də qızılca komponenti və vərəm vaksini ilə bağlı bir neçə
fərziyyə mövcuddur. Ancaq əgər bu təsdiqlənərsə, Gürcüstan tamamilə
qorunmuş olacaq, çünki həm yeni nəsil, həm də köhnə nəsil vərəm
vaksini olunur.
“Geonewest.com” saytının yazdığına görə, peyvənd koronavirus
(COVID-19) infeksiyasının qarşısını almaq üçün vasitə kimi müzakirə
edilmir. Tədqiqatçılar peyvəndin COVID-19 simptomlarının şiddətini
azaldacağına və nəticədə yoluxmuş şəxsin xəstəliyi daha asan
keçirəcəyinə ümid edirlər. Kəskin xəstəlik inkişaf riskinin
azaldılması isə ölüm nisbətini azaldır. Tədqiqatlar vərəm
vaksininin effektivliyini təsdiqləyərsə, COVID-19 peyvəndi icad
olunmazdan əvvəl koronavirusla mübarizədə əhəmiyyətli bir rol
oynayacaq, ancaq qarşısını almağa kömək etməyəcək.
Ümumdünya Səhiyyə Təşkilatının məlumatına görə, vərəm vaksininin
insanları COVID-19 virusuna yoluxmaqdan qoruduğuna dair heç bir
dəlil yoxdur. ÜST aprel ayında bu mövzuda iki klinik araşdırmanın
aparıldığını və dəlil mövcud olduqdan sonra nəzəriyyəni
qiymətləndirəcəyini yazmışdı. Dəlil olanadək ÜST COVID-19-un
qarşısını almaq üçün vərəm vaksinini tövsiyə etmir.
vərəm vaksininin COVID-19-a qarşı effektivliyi ilə bağlı
araşdırmalar hazırda Melburndakı Murdok İnstitutundan əlavə
(hazırda araşdırmada 3500 tibb personalı iştirak edir, eyni zamanda
Hollandiya da daxil olmaqla Avropanı da əhatə edir) Harvard Tibb
Məktəbində və Hindistan Serum İnstitutunda aparılır.
Tamamlanmış tədqiqatın bəzi nəticələrini təqdim edirik:
Hollandiyadakı Radbud Universiteti də vərəm vaksininin koronavirusa
təsirləri ilə bağlı araşdırmalar aparmışdır. Tədqiqatı biri vərəm
vaksini vurulmuş, digəri isə peyvənd olunmamış iki qrupun
müqayisəsi əsasında həyata keçiriblər. Bu araşdırmaya görə,
Hollandiyada koronavirusun ilk dalğası zamanı vərəm vaksini
vurulmuş şəxslərin vəziyyəti daha az hallarda pisləşirdi. Müvafiq
olaraq araşdırmaçılar düşünürlər ki, vərəm vaksininin koronavirusun
simptomlarına qarşı təsiri ola bilər. Bununla belə, qeyd edirlər
ki, tədqiqatın bir sıra məhdudiyyətləri səbəbindən, vərəm
vaksininin koronavirusa (COVID-19) qarşı təsirlərinin nə olduğunu
açıq deyə bilmirlər.
Təbii Sərvətlər və Ekologiya Kolleci və Milli Səhiyyə
İnstitutlarının tədqiqatçıları tərəfindən aparılan ilkin
araşdırmaya görə, vərəm vaksini koronavirusdan (COVID-19) ölüm
sayını azalda bilər. Bununla belə, vərəm vaksini ilə koronovirusun
səbəb olduğu ölüm arasında birbaşa əlaqə olub-olmadığı
araşdırılmalıdır. Tədqiqatçılar, həmçinin vərəm vaksininin
koronavirusun ağır formasına qarşı qısa müddətli bir qorunma təmin
edəcəyinə ümid edirlər ki, bu da tibb işçiləri və risk qrupundakı
xəstələr üçün xüsusilə əhəmiyyətli olacaq.
İyul ayında nəşr olunan və 1000-dən çox koronavirus halı olan
ölkələrin məlumatlarını özündə cəmləşdirən başqa bir araşdırmada
universal vərəm vaksini istifadə olunan ölkələrin xəstələnmə və
ölüm nisbətlərinin bu peyvənd olmayan ölkələrə nisbətən daha aşağı
olduğu qeyd olunur. Bununla yanaşı, digər müəlliflərin elmi
məqalələrində vərəm vaksininin koronavirusun (COVID-19) ağır
formasından qoruması ilə bağlı kifayət qədər dəlil olmadığını
vurğulanır. Bunu təsdiqləmək üçün isə vərəm vaksininin yüksək
səviyyədə istifadə olunduğu və 1 avqust tarixinə qədər
koronavirusdan ölüm hallarının yüksək olduğu ölkələri (Boliviya,
Panama, Kolumbiya, Peru, Braziliya, Meksika və Cənubi Afrika) misal
göstərilib.
Ayrıca, Kaliforniyadakı Santa Barbara Universitetinin apardığı
araşdırmada qeyd olunub ki, İsveçin məlumatları yeni doğulmuş
körpələrə vərəm vaksini vurlmasının COVID-19-dan qorunmadığını
göstərir. İsveçdə vərəm vaksini 1975-ci ilin aprelindən etibarən
məcburi deyil. Müvafiq olaraq, 1975-ci ilin mart və aprel aylarında
anadan olan vətəndaşlar koronavirusa qarşı eyni dərəcədə
həssasdırlar və mart ayında anadan olanlar vərəm vaksini olunub,
aprel ayında anadan olanlar isə yox. 70-ci illərdə İsveç
siyasətindəki dəyişiklik təsadüfi seçimlə nəzarət olunan araşdırma
effekti yaratdı. Araşdırmanın nəticələrinə görə, iki qrupda
adambaşına düşən COVID-19 yoluxma halı, xəstəxanaya yerləşdirmə və
ölüm statistikaları bir-birinə bənzəyirdi. Tədqiqat nəticəsində
məlum olub ki, məcburi vərəm vaksini ilə COVID-19 nəticələri
arasındakı nisbət müxtəlif ölkələrdə çox dəyişir, ancaq, İsveçdə
uşaqlıqda peyvənd olunmuş və peyvənd olunmamış şəxslər arasında
COVID-19-un oxşar nəticələri vərəm vaksini və onun yaratdığı
immunitetin qeyd olunan nisbətə səbəb ola bilməyəcəyini göstərir və
bu digər dəyişənlərin nəticəsi ola bilər.
“Geonewest.com” saytındakı məqalənin müəllifinin yazdığına görə,
keçmiş Sovet İttifaqı ərazisində vərəm əleyhinə peyvəndin geniş
tətbiqi virusun postsovet məkanında Avropa və ABŞ-dan daha az
yayılmasının səbəblərindən biridir və bu pandemiyanın başlanğıcında
Rusiya mediasında fəal şəkildə yazılırdı.
Bu əsassız iddialara Nyu-York Texnologiya İnstitutunun Bioloji
Elmlər Bölməsinin elmi məqaləsi (peyvənd siyasəti ilə COVID-19 ölüm
nisbəti arasındakı əlaqəyə dair) əsas göstərilirdi ki, bu da yalnız
elmi işin ilkin variantı (preprint) idi. Araşdırma şəklində dərc
etməzdən əvvəl bu, ilk öncə müxtəlif mütəxəssislər tərəfindən
nəzərdən keçirilməlidir. Məqalə 24 mart tarixində yayımlanıb və
hələ də kollegiya yoxlamasından keçməyib.
Məqalədə, universal vərəm vaksini siyasətinə sahib ölkələrdə milyon
insana düşən ölüm sayı belə siyasətə sahib olmayan ölkələrdə milyon
nəfərə düşən ölüm sayı ilə müqayisə edilir. Ölkələr üç kateqoriyaya
bölünür: aşağı, orta və yüksək gəliri olan ölkələr. Qeyd edək ki,
vərəm vaksini əsasən aşağı gəlirli ölkələrdə istifadə olunur.
Ölüm göstəricisinə çoxsaylı digər amillər (məsələn, əhalinin orta
yaşı, yoluxma sayına görə xəstəxana yataqlarının sayı, lazım olan
avadanlıq və s.) təsir edir və bu dəyişkənlər məqalədə nəzərə
alınmır. Koronavirusdan çox sayda ölüm Çin (4.6 mindən çox) və İran
(26 mindən çox) kimi universal vərəm vaksininin geniş istifadə
olunduğu ölkələrdə də qeydə alınır ki, bu da özlüyündə müəllifin
fikirlərini şübhə altına alır. Bundan əlavə, fərqli ölkələrdə
virusun yayılması müxtəlif dövrlərdə başlamış və yayılma
mərhələlərindədir. Nəticə olaraq, bənzər müqayisə düzgün deyil.
წყარო:
https://factcheck.ge/ იაკობ ლაჩაშვილი