Azərbaycan Prezidenti İlham Əliyevin sözlərinə görə, Ermənistan
Azərbaycan ərazisindən keçərək Rusiya ərazisinə bağlanacaq.
Əliyevin sözlərinə görə, nəqliyyat layihələri üzərində işləyəcək
işçi qrup yaradılacaq.
Bu barədə Əliyev, Nikol Paşinyan və Vladimir Putinin də qatıldığı
üçtərəfli görüşdən sonra danışıb.
“Rusiya paytaxtında olmaq hər zaman xoşdur və dəvət və
üçtərəfli görüş üçün bir daha təşəkkürümü bildirirəm. İclasın çox
faydalı və səmimi keçdiyini düşünürəm, çünki görüşün sonunda birgə
bəyanat imzalaya bildik.
Bu, müharibənin bitməsindən bəri imzalanan və keçən il baş
verənlərin mahiyyətini vurğulayan ikinci bəyanatdır.
Bəyanat bölgəmizdə tamamilə yeni bir vəziyyət yaratmağı hədəfləyir.
Məsələn, yolların açılması. Yolların açılması bizim üçün vacibdir,
çünki təxminən 30 ildən sonra Azərbaycan Ermənistanın nəqliyyat
kommunikasiyalarından istifadə edərək Naxçıvan Muxtar Respublikası
ilə, Ermənistan Respublikası isə Azərbaycan ərazisindən istifadə
edərək Rusiya və İranla dəmir yolu əlaqəsinə sahib olacaqdır.
Naxçıvan Respublikasından keçərək Türkiyə bazarı ilə də əlaqəmiz
olacaq. Türkiyə və Rusiyanın dəmir yolu arteriyaları
birləşdiriləcəkdir. Beləliklə, bəyanat geniş imkanlar açır",- deyə
İlham Əliyev Putin və Paşinyanla üçtərəfli görüşdən sonra keçirdiyi
mətbuat konfransında bildirib.
“Əminəm ki, bu gün yaratdığımız işçi qrupu səmərəli işləyəcək və
vaxtaşırı görülən işlər barədə bizə məlumat verəcəkdir. Bu bir
deyil, bir neçə layihədir. Hamısının yerinə yetiriləcəyinə
əminəm", - deyə Əliyev əlavə edib.
11 yanvarda Moskvada keçirilən görüş İlham Əliyevlə Nikol Paşinyan
arasında müharibənin bitməsindən bəri gərçəkləşən ilk rəsmi
görüşdür.