14 iyul tarixində “Salam” platformasının təşkilatçılığı ilə
Tbilisidə, hökumət binası qarşısında “Fləşmob” baş tutub. Bu barədə
məlumatı “Marneuli” radiosuna müsahibəsi zamanı “Salam”ın
həmtəsisçisi Rabil İsmail verdi.
Onun sözlərinə görə, fləşmobun təşkil olunmasının əsas
səbəblərindən biri dövlətin etnik azlıqların təhsil almaları ilə
bağlı yetərli addımları atmaması olub.
Rabil İsmailin sözlərinə görə, dövlət 1+4 proqramı ilə təhsil alan
etnik azlıqlardan ödəniş tələb etməklə dövlət dilini öz vətəndaşına
pulla öyrətmiş olur.
“Fləşmob hökumət binasının qarşısında baş tutdu. Harada
ki, bütün gün baş nazir və digər məmurlar yığışırlar. Bu birbaşa
dövlətə bir mesaj idi. Onlar təhsildə olan problemləri həll
etməlidirlər. Biz orada şamlar yandırdıq və şüarlar yazdıq “Mənə
gürcü dilini pulsuz öyrət” bu kampaniyanın ən böyük sloqanı idi. Bu
sloqanın altında biz nəzərdə tutmuşduq ki, 1 + 4 proqramının pullu
olması ədalətsizlikdir. Birinci il pulsuz olmalıdır, vətəndaşlar
dövlət dilini öyrənməyə pul ödəməməlidirlər. Bu proqramın yaranma
səbəbi o idi ki, etnik azlıqların yaşadıqları bölgələrdə normal
məktəb, bağça və müəllimlər yoxdur. Ona görə də dövlət qəbul etdi
və kompensasiya şəklində belə bir proqram yaratdılar. Lakin
kompensasiya eyni zamanda pul tələb edir. Burada tələbələr 2250
lari ödəyirlər, bu isə bakalavr təhsili qiymətidir bu belə
olmamalıdır. Dövlət dili öyrədir və qarşılığında pul tələb edir.
Belə bir fləşmobun təşkil olunmasının səbəbi odur ki, Gürcüstanda
təhsil islahatları ili sayılır. Düşünürük ki, bir sıra islahatlar
olmalıdır. Burada məqsəd 1+4 proqramı pulsuz olması və kəndlərdə
məktəblərin təmir olunması idi. Etnik azlıqların yaşadığı
bölgələrdə uşaq bağçalarının olmaması böyük problemdir".
O, həmçinin etnik azlıqların yaşadıqları kəndlərdə də təhsillə
bağlı müxtəlif problemlərin olduğundan danışdı. Rabil İsmail deyir
ki, kəndlərdəki təmirsiz məktəblərlə yanaşı bağçaların olmaması da
insanları narahat edən əsas problemlərdən biridir.
“Hal-hazırda, misal üçün, Bolnisidə 12 bağça var və 12
də etnik azlıqların yaşamadığı bölgələrdədir, kəndlərdədir.
Dmanisidə 9 bağça var və heç biri azərbaycanlıların yaşadığı
kəndlərdə deyil. Bunun özü özlüyündə bir faktdır ki, 30 il ərzində
dövlət, nə də yerli və mərkəzi hakimiyyət heç vaxt təhsil sisteminə
diqqət ayırmayıb. Etnik azlıqlar üçün təsilin əlçatanlığı yüksək
səviyyədə olsun, ən azından normal səviyyədə olsun. Məqsəd bu
məsələni gündəmə gətirmək idi. Dövlət 1 + 4 proqramını cəmiyyətə
satır. Sanki burada dövlət bir növ qurtarıcıdır, xalqı, gəncliyi
qurtarır. Halbuki, bu haqsızca bir addımdır. Dövlət hər bir gəncdən
hər il üçün 2250 lari alır və haqsızlıq edir”.
Qeyd edək ki, bu kampaniya platformanın təşkil etdiyi ilk kampaniya
deyil. Bundan başqa da “Salam” platforması tərəfindən gürcü dili
hazırlıq kursunun pulsuz olması ilə bağlı müxtəlif kampaniyalar
həyata keçirilib.
Söhbət Gürcüstanda 2010-cu ildən tətbiq edilən “1+4” proqramından
gedir. Proqram abxaz, osetin, erməni və azərbaycan dillərində ümumi
qabiliyyət imtahanı verməklə ali təhsil almaq imkanını nəzərdə
tutur. Tələbələr bir il ərzində gürcü dili hazırlıq kursu keçirlər
və bundan sonra istədikləri fakültədə təhsilə davam edirlər.
Qeyd: "GürcüDiliniPulsuzÖyrət"
nəyi nəzərdə tutur?
• #GürcüDiliniPulsuzÖyrət məktəbəqədər təhsilə imkanının bərabər
tələbini nəzərdə tutur,
• #GürcüDiliniPulsuzÖyrət keyfiyyətli və ikidilli məktəb təhsilinə
tələbi nəzərdə tutur,
•
#GürcüDiliniPulsuzÖyrət ali təhsilin hamı üçün əlçatan olmasını
nəzərdə tutur.