25 dekabr tarixində “Yeni Düşüncə İnstitutunda” “Etnik azərbaycanlı
gənclərin milli imtahanlara hazırlaşmasına dəstək” layihəsi
çərçivəsində görüş keçirildi.
Layihədə iştirak edən, abituriyentlərin hazırlanmasında əməyi olan
müəllimlərə təşəkkürnamə təqdim edilib. Bu barədə “Yeni Düşüncə
İnstitutunun” təsisçilərindən olan Kamran Əfəndiyev “Marneuli”
radiosu ilə söhbəti zamanı bildirdi ki, “Açıq Cəmiyyət Fondunun”
dəstəyi ilə həyata keçirilən bu layihəyə Sadaxlı inzibati ərazi
vahidliyinə daxil olan kəndlərdən abituriyentlər qoşulmuşdular və
hər biri Gürcüstanın müxtəlif Dövlət Universitetlərində tələbə
adını qazanıb, oxuyurlar. “Yeni Düşüncə İnstitutunun” tarixində bu
layihə ən uğurlu və uzunmüddətli layihələrdən biridir.
“Keçən olduğu kimi, artıq bu il də layihə davam edir və
yanvarda, tətildən sonra aktiv şəkildə abituriyentlərlə işləməyə
başlayacağıq. Bu dəfə Sadaxlı, Tsopi və ətraf kəndlərdən
abituriyentlər bizə qatılacaqlar. Dünənki görüşə gəlincə isə
məqsədimiz layihədə iştirak edən müəllimləri təşəkkürnamələrlə
təltif etmək idi. Onların bizim əldə etdiyimiz bu uğurda çox böyük
əməkləri var. İstədik ki, bütün ictimaiyyət və gələcək
abituriyentlər qarşısında müəllimləri təltif edək, gələcək
abituriyentlərin maraqlandıqları sualları müəllimlərə ünvanlamaq
imkanına sahib olsunlar və bu şəkildə söhbət etmiş olsunlar. Qeyd
edim ki, biz təkcə Sadaxlı və ətraf kəndlərdə yaşayan
abituriyentlərə xidmət etmirik. Artıq üçüncü il olur ki, imtahana
yaxın vaxtlarda imtahanda düşəcək suallara bənzər onlayn şəkildə
sınaq imtahanı təşkil edirik. Bu sınaq imtahanları nəticəsində
Gürcüstanın hər yerindən – Qoridən, Telavidən, Aqaradan və Kvemo
Kartlidən etnik azərbaycanlı gənclər qoşulur və özlərini
sınayırlar. Bu isə onların biliklərini daha da inkişaf
etdirmələrində böyük rol oynayır”, – Kamran Əfəndiyev
dedi.
Hər il olduğu kimi bu il də “Yeni Düşüncə İnstitutu” layihə
çərçivəsində 30-dan artıq abituriyentin bu layihədə fəal şəkildə
iştirakını gözləyir.
“Bu il də analoji olaraq, yaxın zamanlarda layihəyə
başlamaq istəyirik və 30-dan artıq abituriyentin layihədə
iştirakını gözləyirik. Paralel olaraq bu il yenilik etmək istədik
və üç videoçarx çəkməyi düşünürük. Videoçarxı tanınmış riyaziyyatçı
Elvir Həsənoğlu çəkəcək. O, abituriyentlər tərəfindən ən çox
ünvanlanan sualları cavblandıracaq. Bu videoçarxı isə sosial
şəbəkələrdə paylaşacağıq ki, bizə qoşula bilməyən abituriyentlər
maksimum şəkildə yararlansınlar. Bununla yanaşı, sınaq imtahanı
may-iyun aylarında hazır olacaq. Abituriyentlərə əyani olaraq
Mollaoğlu və Xüldərə kəndlərində gürcü dili və riyaziyyat dərsləri
keçirik”.
Qeyd edək ki, “Yeni Düşüncə İnstitutu” artıq 5 ildir, “Açıq
Cəmiyyət Fondu” ilə əməkdaşlıq edir və bu layihə çərçivəsində 4 il
ərzində 102 abituriyent Gürcüstanın müxtəlif Dövlət
Universitetlərində təhsil alır.
Müəllif: Gülçin İsmayılova