Filoloq Oqtay Kazımov Mirzə Fətəli Axundovun 210 illiyinə həsr
olunmuş mükafatla təltif olunub.
Mükafat Axundov ev muzeyinin direktoru Leyla Əliyeva tərəfindən 28
dekabr tarixində Tbilisidə keçirilən “Gücümüz Həmrəyliyimizdədir”
adlı tədbirdə təqdim olundu.
Oqtay Kazımov "Marneuli" radiosu ilə söhbəti zamanı bildirdi ki,
belə bir mükafatla təltif olunmaq onun üçün qürurverici hissdir.
Onun sözlərinə görə, bu günə qədər o, Axundovun ev muzeyində təşkil
olunan bütün görüşlərdə iştirak edib. O, gənclərin
məlumatlandırılması üçün muzeydə bir çox işlərin həyata
keçirildiyini deyir.
“Tədbirin gedişində Mirzə Fətəli Axundovun anadan olmasının 200
illiyi ilə bağlı medal ilə təltif olundum. Əlbəttə bu mənim üçün
böyük bir xoşbəxtlikdir. Orada keçirilən tədbirlərin azarkeşiyəm və
hər birində iştirak edirəm. Həqiqətən də gənclərə bizim
mədəniyyətimizin təqdim olunması üçün bir çox işlər görülür. Bu
medalla məni təltif etmələri xoş sürpriz idi. İli möhtəşəm şəkildə
bununla bağlamış oldum. Yeni ili böyük bir sevinc və stimulla
başlamış oldum. Çox təşəkkür edirəm. İnsanın mükafatlandırılması
onda xoş təəssürat yaradır”.
Kazımov bu günə qədər Axundovun “Hekayəti Müsyo Jordan və Dərviş
Məstəli şah” pyesini Azərbaycan dilindən gürcü dilinə tərcümə
etdiyini deyir.
“Mən əgər bir pyesini tərcümə etməmiş olsaydım, həqiqətən
deyərdim ki, mən bu mükafata layiq deyiləm. Bir halda ki, mənim
Axundovun yaradıcılığı ilə bir kəsişməm olub və belə bir mükafat
almışamsa, bu mənim üçün çox xoşdur. Çəkdiyim müəyyən zəhmət lazımi
səviyyədə və həddindən artıq qiymətləndirilib. Əlbəttə bu medal
indiyə qədər gördüyüm deyil, indən sonra yaradıcılığını gürcü
cəmiyyəti üçün tanıtmaq məqsədi ilə görəcəyim işlərə həsr
olunub”.
Oqtay Kazımov gələcəkdə Axundovun əsərlərinin gürcü dilinə tərcümə
olunması üçün əlindən gələni edəcəyini qeyd etdi.
Bununla yanaşı tədbirdə çıxış edən iştirakçılara və jurnalistlərə
də muzey tərəfindən xüsusi mükafatlar təqdim olundu.
Məlumat üçün bildirək ki, tədbir iştirakçılarına təqdim olunan
mükafat Tbilisidə yaradılan Mirzə Fətəli Axundov muzeyinin
yaradılmasının 40 illiyinə və Mirzə Fətəli Axundovun 210 illiyinə
həsr olunub.
Tədbirdə Azərbaycanın Gürcüstandakı səfirliyinin əməkdaşları,
Türkiyənin Gürcüstandakı səfirliyinin nümayəndələri, ziyalılar,
gənclər və dəvət olunmuş qonaqlar iştirak edirdi. Tədbirdə çıxış
edən qonaqlar Azərbaycan xalqını qarşıdan gələn "Dünya
Azərbaycanlılarının Həmrəylik Gününü" və yeni il münasibəti ilə
təbrik etdilər.
Qeyd edək ki, bina M.F.Axundovun öz vəsaiti hesabına inşa edilib.
1982-ci ildə Gürcüstanın azərbaycanlı ziyalılarının bu ölkənin
rəhbərliyinə müraciəti əsasında binada muzey təsis edilib və
M.F.Axundovun ev-muzeyi kimi fəaliyyət göstərib. 1996-cı ildə
Heydər Əliyevin Gürcüstana rəsmi səfərindən sonra M.F.Axundovun
ev-muzeyi təmir olunub, həmin vaxtdan M.F.Axundov adına Azərbaycan
Mədəniyyət Mərkəzi kimi fəaliyyət göstərib. 2007-ci ildə ev-muzeyə
M.F.Axundov adına Azərbaycan Mədəniyyəti Muzeyi statusu verilib.
2013-cü ildə Azərbaycan Respublikasının vəsaiti hesabına muzeydə
əsaslı təmir və yenidənqurma işləri həyata keçirilib.
Hazırda muzeyin nəzdində mədəniyyət mərkəzi fəaliyyət göstərir.
Mərkəzdə xalçaçılıq, musiqi, muğam, rəsm və dil kursları mövcuddur.
Muzeyin əsas fəaliyyət istiqamətləri Azərbaycan mədəniyyətini,
mədəni irsini təmsil və təbliğ etməkdir. Muzeydə mədəni tədbirlər,
görüşlər, konfranslar təşkil edilir.
"Marneuli" Radiosu