İslam dinində yetkinlik yaşına çatmış və kasıb olmayan hər bir şəxs
Ramazan ayının sonuncu günü fitrə çıxmalıdır.
Həmin fitrə isə kasıb, yolda qalmış və vəziyyəti ağır olan
insanlara verilməlidir. Bütün Gürcüstan Müsəlmanları İdarəsinin
şeyxi Hacı Ramin İgidovun sözlərinə görə, Gürcüstandakı qiymətləri
nəzərə alaraq bu il üçün adambaşi fitrə zəkatı ən azı 7-8 lari
hüdudunda hesablanıb.
“Əlbəttə, onu da qeyd etməliyik ki, insan öz maddi
imkanından asılı olaraq ərzaq növləri arasında daha bahalı olanını
seçə bilər, ya da fitrə zəkatının miqdarını 3 kq.-dan çox götürə
bilər. Yetkinlik yaşına çatmış fəqir olmayan hər kəs özü və
himayəsində olan (çörəyini yeyən) hər bir nəfər üçün fitrə verir.
Hər nəfər üçün 1sa' (təqribən 3 kq) buğda, arpa, xurma, kişmiş,
düyü, qarğıdalı və ya bunların dəyəri qədər pul. Yaxşı olar ki
maddi vəziyyəti yaxşı olanlar ən bahalı olanın (yəni düyü, xurma və
kişmişin) qiyməti dəyərini versinlər. Ən azından yayqın ərzq
növünün üzərində hesablanması da
məqsədəuyğundur.”
Şeyxin bildirdiyinə görə, fitrə Ramazan bayramının axşamı çıxılır
və bayram günü günorta namazına qədər verilməlidir.
“Fitrə bayram axşamı çıxılır, bayram gününün günorta
namazına qədər verilməsi gərəkdir. Əgər müəyyən üzürlü səbəbdən
nəzərdə tutulan şəxsə çatdırmaq gecikərsə, eybi yoxdur. Müstəhəbdir
ki, insan fitrəsini verəndə qohum fəqirləri başqalarından qabağa
salsın, sonrakı mərhələdə fəqir qonşularına, sonra isə fəqir elm
əhlinə versin. Fitrə zəkatı fəqirə, yolda qalan müsafirə, ağır
durumda olan borcluya və s. verilə bilər. Fitrə zəkatını möminə
vermək müstəhəbdir. Seyyid olmayan şəxs, seyyidə fitrə zəkatı verə
bilməz. İslam şəriətində fəqir elə şəxsə deyilir ki, özünün və
ailəsinin bir illik dolanışıq xərcinə sahib deyil. Müəyyən işi və
qazancı olsa da, ailəni idarə etməyə kifayət etmir. Bir sözlə çox
çətinliklə dolanır.”
Qeyd edək ki, bu il astronomik hesablamalara görə, Ramazan bayramı
aprel ayının 21-ə təsadüf edəcəyi ehtimal olunur.